Daxili siyasət

Daxili siyasət

Fuad Muxtarov: “Qurultayda partiyanın sədrliyinə namizədliyimi irəli sürsəm, qarşımı heç kim ala bilməz”

29 may 2008 13:33 (UTC +04:00)

Bakı. Elnur Məmmədli APA. “Partiyanın qurultayında sədrliyə namizədliyimi irəli sürsəm, mənim qarşımı heç kim ala bilməz. Heç bir koalisiyanın, heç bir qruplaşmanın mənə verilən səslərin sayını azaltmaq imkanı yoxdur”. Bunu APA-ya açıqlamasında Azərbaycan Milli İstiqlal Partiyasının (AMİP) sədr əvəzi, partiyanın baş katibi Fuad Muxtarov partiya sədrliyinə iddialı olan Goranboy rayon təşkilatının sədri Fəqani Məhərrəmovun AMİP-də bir sıra şəxslə ittifaq yaratmasına münasibət bildirərkən deyib. F. Məhərrəmovun ona qarşı ittifaq yaratmasının arxasında hansı məqsədin dayanmasından xəbərsiz olduğunu deyən F. Muxtarov bu cür addımlara ehtiyac görmür: “Onlar nədən narahatdır, niyə ittifaq bağladıqlarını bilmirəm. Çünki mən belə hallardan çox uzağam. Digər tərəfdən isə bu günə qədər sədrliyə namizədliyimi irəli sürəcəyimlə bağlı bir söz deməmişəm”. Partiyanın beynəlxalq əlaqələr sahəsini inhisarda saxlaması ilə bağlı ünvanına səslənən ittihamlara gəldikdə, F. Muxtarov burada hər hansı inhisarçılığın olmadığını bildirib: “Sadəcə, AMİP-in beynəlxalq əlaqələr sahəsi mənə həvalə edilib. Təbii ki, bütün beynəlxalq əlaqələr mənimlə bağlıdır. Digər tərəfdən, partiyada bu işi məndən yaxşı bacaran ikinci şəxs görmürəm”.