Daxili siyasət

Daxili siyasət

Müxalifət partiyaları “Azadlıq” blokunun boykot qərarını ciddi qəbul etmədiklərini bildiriblər - YENİLƏNİB

Müxalifət partiyaları “Azadlıq” blokunun boykot qərarını ciddi qəbul etmədiklərini bildiriblər - <font color=red>YENİLƏNİB</font>

30 may 2008 11:26 (UTC +04:00)

Blokun üzvü olan Azərbaycan Xalq Cəbhəsi Partiyasının (AXCP) mətbuat xidmətindən APA-ya daxil olan bəyanatda blok Seçki Məcəlləsinə edilən əlavə və dəyişikliklərin azad və ədalətli seçkilərin keçirilməsinə təminat vermədiyini bildirir və bu dəyişikliklərdə beynəlxalq təşkilatların, Azərbaycan müxalifətinin təkliflərinin nəzərə alınmadığını qeyd edir. Onlara görə, bir sıra dəyişikliklərin isə qanunu daha da sərtləşdirərək, siyasi partiyalar, namizədlər və seçicilər üçün əlavə problemlər yaradıb. Blokun boykot qərarını çıxarmasını əsaslandırmaq üçün sadaladığı səbəblər arasında yeni məcəllədə xaricdə yaşayan vətəndaşların namizədlik hüququndan məhrum edilməsi, “exit-poll” keçirən təşkilatların MSK-nın müəyyənləşdirdiyi qaydada akkretidasiyadan keçməsi, əlavə seçici siyahılarının tətbiqinə şərait yaradılması, seçkiqabağı təşviqat hüququnun məhdudlaşdırılması, təşviqat müddətinin 2 dəfədən çox qısaldılması, depozitin məbləğinin artırılması və s var. Bəyanat müəllifləri bildiriblər ki, bütün bunları nəzərə alaraq, blok seçkilərdə iştirak etməməyə qərar verib və seçkiləri boykot etməsi barədə qərar çıxarıb.
Qeyd edək ki, “Azadlıq” blokunda Azərbaycan Xalq Cəbhəsi, Liberal, Vətəndaş və İnkişaf partiyaları təmsil olunur.
Azərbaycan Demokrat Partiyasının (ADP) sədri Sərdar Cəlaloğlu isə bu qərarın proseslərə ciddi təsir etməyəcəyini deyib. Onun sözlərinə görə, boykot o zaman özünü doğrulda bilər ki, seçkilər yalnız hakimiyyəti əldə etmək məqsədi daşısın və seçkilərə gedən qüvvə nəyin bahasına olursa olsun hakimiyyəti əldə etmək məqsədi güdsün. S. Cəlaloğlunun fikrincə, seçkilər eyni zamanda ictimai münasibətlərə yenidən baxmaq, ölkədəki problemlərin həllində iştirak etmək, müxalifətin təşkilatlanması, tərəfdarlarını aktivləşdirməsi və artırılmasına xidmət edən aksiyadır: “Bu baxımdan boykot bu tələblərə cavab vermir və düzgün hesab edilə bilməz. Buna baxmayaraq, blokun qərarına hörmətlə yanaşıram və hesab edirəm ki, partiyaların siyasi proseslərdə müxtəlif mövqe tutması təbiidir”.
Müsavat Partiyasının Məclis sədri Sülhəddin Əkbər ictimai siyasi aktivliyin yüksək olmadığı bir şəraitdə boykotun demokratiya uğrunda mübarizədə düzgün yol olmadığını bildirib. Onun fikrincə, belə bir şəraitdə daha aktiv yol seçilməlidir: ““Azadlıq” blokunun seçkiləri boykot etməsinin nəyəsə təsir edəcəyini düşünmürəm. Ona görə ki, bu qərar müxalifəti əhatə etmir. Hətta bütöv müxalifət belə seçkini boykot etsə belə, hansısa nəticənin olacağını düşünmürəm. Bu beynəlxalq birliyə hesablanmış addımdırsa, beynəlxalq aləmin Ermənistandakı seçkilərə münasibətinin hamı şahidi oldu. Hətta insanların güllələnməsinə belə lazımı reaksiya göstərilmədi. Seçkilərdə əsas olan xalqın müqavimətini təşkilidir ki, bunun da məsuliyyəti müxalifətin üzərinə düşür. Bunun üçün seçkidə mütləq iştirak etmək və verilən imkanlardan maksimum yararlanmaq lazımdır”.
Klassik Xalq Cəbhəsi Partiyasının (KXCP) sədri Mirmahmud Mirəlioğlu da blokun boykot qərarının proseslərə təsir etməyəcəyini düşünür: “Amma blokun atdığı addım təbii qarşılanmalıdır. Siyasi mübarizənin metodlarından biri də seçkilərin boykotudur. Hər kəsin seçkilərdə iştirak və boykot hüququ var, heç kim kiməsə öz qərarında diqtə etməməlidir”.
Yeni Azərbaycan Partiyasının icra katibinin müavini Siyavuş Novruzov isə bildirib ki, partiya seçkidə iştirak etmək üçün yaradılır və normal siyasi fəaliyyətlə məşğul olmaq istəyən partiya seçkilərdə iştirak etməlidir: “Amma “Azadlıq” blokunda nə normal üzvlər və də ortaya çıxacaq bir namizəd var. Onlar da buna görə belə qərar çıxarıblar”.
Politoloq İlqar Məmmədov bildirib ki, hər hansı partiya indiki şəraitdə seçkiləri boykot edirsə, bu həmin qüvvənin özünə siyasi inamsızlıqdan irəli gəlir: “ Boykot qərarı verən qüvvələr 1995-ci ildən bəri siyasi baxımdan 8 seçki və referendumu uduzublar. Başqa şəraitdə boykot qərarı o qədər də zəruri olmasa da, bəzi hallarda tətbiq oluna bilər. Amma 8 seçkini uduzmuş siyasi qüvvələrin seçkiləri boykot etməsi heç nəyə təsir etmir. Yəni artıq özlərində qüvvə hiss etmirlər və bu səbəbdən də seçki prosesində iştirakdan imtina edirlər. Əgər prosesə təsir edə bilsəydi, yəqin ki, seçkidə iştirak etmək qərarı verərdilər. Ona görə də həmin qüvvələrin seçkilərdə iştirak edib etməməsinin heç bir prinsipial əhəmiyyəti yoxdur”.