Daxili siyasət

Ana səhifə

Daxili siyasət

Yaqub Abbasov: “Rauf Arifoğlu mənim vasitəmlə iki il Rəsul Quliyevin mirzəsi olub”

02 iyun 2008 12:27 (UTC +04:00)

Bunu APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı ACP təmsilçilərinin prezident seçkilərində Müsavat Partiyasının eks-spiker Rəsul Quliyevin namizədliyini dəstəkləməklə bağlı niyyətlərinə münasibət bildirərkən deyib. ACP üzvlərinin Müsavat üzərinə hücumlarına təəssüf etdiyini bildirən A. Hacılının fikrincə, R. Quliyevin hələlik namizədliyini irəli sürmədiyi, mövqeyinin bəlli olmadığı halda Müsavata qarşı çıxışlar etmək düzgün deyil: “Rəsul Quliyev müavinlərinə Müsavata qarşı bu xoşagəlməz kampaniyanı dayandırmaq tapşırığı verməlidir. Bu kampaniya nə ACP-yə, nə Rəsul Quliyevə, nə də Müsavata xeyir gətirir. Mənə elə gəlir ki, onların hədəfi Müsavat yox, hakimiyyət olmalıdır”. A. Hacılı bildirib ki, hazırda ACP təmsilçiləri Müsavatı bir çox məsələdə ittiham etdiklərindən, onların R. Quliyevin namizədliyini dəstəkləməsi barədə müzakirə aparmaq belə qeyri-mümkündür: “Belə münasibətlə digər təşkilatdan dəstək ummaq olmaz”.
ACP sədrinin müavini Yaqub Abbasov isə APA-ya bildirib ki, partiyalar arasındakı qarşıdurmanın kökündə dəstək ummaq niyyəti yox, Müsavatdakı bir sıra şəxsin antimilli mövqe tutması dayanır: “2003-də biz mövcud vəziyyəti araşdırdıq və İsa Qəmbərin namizədliyinin dəstəklənməsi qərarına gəldik. Bu o vaxtın reallığı idi. İndi isə bizim onların dəstəyinə ehtiyacımız yoxdur. Sadəcə, ötən il milli forum keçirdik, eyni mövqedən çıxış etmək təklifini irəli sürdük və bu forumun davamlı olmasını istədik. Amma bizə qısqanclıqla yanaşdılar və bu forumun davamlı olmasına imkan verilmədi. Müsavatda yaxşı münasibətdə olduğumuz insanlarla yanaşı, yaramaz adamlar da var. Onların partiyaya aidiyyəti yoxdur, şəxsi maraqlarını, müəyyən dairələrin tapşırıqlarını yerinə yetirməklə məşğuldurlar. Rauf Arifoğlunun əməllərini cəmiyyətə açıb göstərmək lazımdır və bu missiyanı mən öz üzərimə götürmüşəm. Rauf Arifoğlu mənim vasitəmlə iki il Rəsul Quliyevin mirzəsi olub. Bu faktdır. 1997-98-ci illərdə çıxan yazıları sübut kimi göstərə bilərəm”.
“Yeni Müsavat” qəzetinin baş redaktoru Rauf Arifoğlu isə APA-ya açıqlamasında bildirib ki, xeyli vaxtdır Yaqub Abbasovun onun barəsində şərəf və ləyaqəti ləkələyən məlumatlar yaymasını izləməkdə davam edir: “Mən həmin açıqlamaların dərc olunduğu qəzetlərin bəzilərini saxlayıram. Gözləyirdim ki, bu adam nə zamansa dayanacaq. Təəssüf ki, dayanmadı. Ona görə də mən onunla bağlı məhkəməyə müraciət etməyə məcburam”. Baş redaktor deyib ki, ACP sədrinin müavini ilə bağlı məhkəməyə xüsusi ittiham qaydasında müraciət edəcək: “Ölkədə jurnalistlər həbsdədir, siyasətçilərdən isə hazırda həbsdə olanı yoxdur. Mən də bir siyasətçini həbs etdirmək təşəbbüsü göstərəcəm”.
R. Arifoğlu bildirib ki, Y. Abbasovun fikirlərini birtərəfli qaydada yayan KİV-lərin, o cümlədən ”Azadlıq” və “Reytinq” qəzetlərinin təkzib verməsi ilə də bağlı məhkəməyə müraciət etmək barədə düşünür.