Daxili siyasət

Ana səhifə

Daxili siyasət

Azərbaycan müxalifətində prezident seçkilərini boykot etməklə bağlı müxtəlif fikirlər var - SORÄžU

Azərbaycan müxalifətində prezident seçkilərini boykot etməklə bağlı müxtəlif fikirlər var - <font color=red>SORÄžU</font>

03 iyun 2008 12:19 (UTC +04:00)

Bunu APA-ya açıqlamasında “Müsavat” deputat qrupunun üzvü, millət vəkili Pənah Hüseyn deyib. Onun sözlərinə görə, Seçki Məcəlləsində depozitin ləğv olunması, seçki müddətinin və təbliğat üçün ayrılmış müddətin azaldılması, təbliğat şərtlərinin dəyişdirilməsi vəziyyəti daha da mürəkkəbləşdirib: “Seçki kampaniyasının başlanmasına iki həftə qalmış belə dəyişikliklərin edilməsi Azərbaycanda yeni vəziyyət yaradıb. Seçkilərdə iştirak etməmək daha arqumentli görünür”.
Azərbaycan Demokrat Partiyasının (ADP) sədri Sərdar Cəlaloğlu isə seçkidə iştirakın tərəfdarıdır. Lakin o, partiyada seçkini boykot tərəfdarlarının ona qarşı qrup yaratdıqlarını bildirib: “Onlar deyirlər ki, seçkini mütləq boykot etməliyik. Mən isə düşünürəm ki, seçkini yalnız qanuni baza və seçkiqabağı dövrlə yox, həm də seçki dövrü və nəticələrlə qiymətləndirmək olar. Buna baxmayaraq, partiyada boykot tendensiyası güclənib, mənə ciddi təzyiqlər var, seçkini boykotun tərəfdarları artır. Partiyanın seçkili orqanları qərar verəndən sonra mən də bu qərara tabe olacağam”.
Bütöv Azərbaycan Xalq Cəbhəsi Partiyasının sədri Qüdrət Həsənquliyev də Seçki Məcəlləsinə edilən əlavə və dəyişikliklərin demokratik prinsiplərdən geri çəkilmək olmasına baxmayaraq, seçkidə iştirakı vacib sayır: “Partiyanın mövqeyi bundan ibarətdir ki, seçkilərin demokratik keçirilməsi seçki qanunundan asılı ola bilməz. Seçkilərin demokratikliyi ölkədəki bütün siyasi qüvvələrin ədalətli seçkilərə qatılması və qanunların icrasının tam təmin olunmasıdır. Əgər seçkilər saxtalaşdırılacaqsa, qanun pozulacaqsa, o zaman həmin qanunun demokratikliyinin əhəmiyyəti yoxdur. Buna görə də hesab edirik ki, istənilən halda seçkiyə qatılmaq lazımdır. Seçkilərdə qanun pozuntularına cəhd olacaqsa, bunun qarşısını almağa cəhd edilməlidir. Bu cəhd nəticə verməsə belə, həmin adamlar ifşa olunmalıdırlar. Yoxsa kənarda durmaqla heç nəyə nail olmaq mümkün deyil. Bu baxımdan seçkilərdə iştirak edəcəyik”.
Müsavat Partiyasının Məclis sədri Sülhəddin Əkbərin sözlərinə görə, partiya Məclisinin seçkilərdə iştirakla bağlı qərarında vəziyyətdən asılı olaraq, boykota üstünlük veriləcəyi istisna edilməyib. Məclisin qərarının birmənalı olmadığını deyən S. Əkbər Seçki Məcəlləsinə edilən əlavə və dəyişikliklərdən sonra yeni situasiyanın yarandığını söyləyib: “Siyasi vəziyyət aydınlaşıb və biz yaranmış vəziyyəti yenidən müzakirə etməyə başlamışıq. Əvvəlcədən konkret söz demək mümkün deyil, çünki partiya rəhbərliyində bu məsələ geniş müzakirə olunur. Əgər Divan məsuliyyəti öz üzərinə götürsə, yekun qərar Divanda qəbul olunacaq. Əks halda, Məclisin iclası çağırılacaq”.
Azərbaycan Milli İstiqlal Partiyasının sədr əvəzi, partiyanın baş katibi Fuad Muxtarov da boykot tərəfdarıdır. O, partiyada boykot tərəfdarlarının daha da aktivləşdiyini vurğulayıb: “Seçki Məcəlləsinə dəyişiklikdən sonra boykot tərəfdarları daha ucadan haqlı olduqlarını bildirirlər. Mənim də şəxsi mövqeyim budur ki, bu qanunla seçkiyə getmək olmaz”. F. Muxtarov bildirib ki, yaxın günlərdə Siyasi Şuranın iclasında ümumi mövqe müzakirə olunacaq, yekun qərar isə qurultayda qərar qəbul ediləcək.
Açıq Cəmiyyət Partiyası isə seçkilərə kimi şərait müsbət istiqamətdə dəyişəcəyi halda, seçkilərə qatılacaq. Partiyanın sədr müavini Yaqub Abbasov APA-ya bildirib ki, partiya son qərarını iyulun sonlarında verəcək: “Vəziyyət belə qalacaqsa, mətbuata basqılar olacaqsa, siyasi mühacirlərin Azərbaycana qayıtmasına imkan verilməyəcəksə, seçkilərə qatılmaqdan söhbət gedə bilməz. Bu vəziyyətdə fon yaratmağın əhəmiyyəti yoxdur”.
Ümid Partiyasının sədri İqbal Ağazadə rəhbərlik etdiyi partiyada seçkiləri boykot əhval-ruhiyyəsinin olmadığını deyib. Onun sözlərinə görə, bu barədə partiyada hər hansı müzakirənin aparılması da nəzərdə tutulmur: “Biz Seçki Məcəlləsinə əlavə və dəyişikliklərin bundan yaxşı olacağını gözləmirdik, illüziyaya da qapılmamışdıq. Ona görə də istənilən halda seçkidə iştirak edib ən azı cəmiyyətin demokratikləşməsi və beynəlxalq təşkilatlar qarşısında götürülən öhdəliklərin yerinə yetirilməsi istiqamətində ciddi səylər göstərmək lazımdır. Vətəndaşların haqları uyğunda mübarizədə pessimist olmaq lazım deyil. Vətəndaşların seçkidə daha da aktiv olmasını istəyirik”.
Qeyd edək ki, AXCP, Milli Birlik Hərəkatı və Vətəndaş və İnkişaf Partiyasının daxil olduğu “Azadlıq” bloku prezident seçkilərini boykot etməklə bağlı artıq qərar qəbul edib.