Zərdab. Zahid Abışov - APA. Bu gün Zərdabda cari ilin birinci yarısında görülən işlər və qarşıda duran vəzifələr dair Zərdab Rayon İcra Hakimiyyətinin başçısı L.Babayevin hesabat yığıncağı keçirilib.
APA-nın yerli bürosunun məlumatına görə, İcra Hakimiyyətinin başçısı hesabat verərək bildirib ki, respublikada gedən sürətli və davamlı inkişaf prosesi 2013-cü ilin birinci yarısının nəticələrinə görə rayonda da geniş müşahidə olunub.
2013-cü ilin birinci yarısında rayon iqtisadiyyatının əsas sahələrində 60 milyon 767 min manatlıq məhsul istehsal edilib ki, bu da keçən ilin müvafiq dövründən 12 milyon manata qədər çoxdur.
Həyata keçirilən tədbirlər nəticəsində 6 ay ərzində rayonda 224 daimi iş yeri yaradılıb.
Rayon iqtisadiyyatının aparıcı qüvvəsi olan kənd təsərrüfatında da inkişaf və irəliləyiş davam etdirilib. Rayonda 2013-cü ildə 475 ha sahədə çiyid səpini aparılıb. 2013-cü ilin məhsulu üçün 17134 ha payızlıq taxıl əkilib. Alaq otlarına qarşı 2126 hektarda, ziyanvericilərə qarşı 57 hektarda, çəyirtkəyə qarşı isə 1260 hektarda kimyəvi mübarizə tədbirləri aparılıb. Artıq taxıl biçini respublikada birinci olaraq başa çatdırılıb. 17134 hektar sahədən 47097 ton məhsul istehsal olunub ki, bu da hər hektardan 27,5 sentner olmaqla ötən ildəkindən 8 min tondan artıq məhsul istehsalı deməkdir. O cümlədən 11323 hektar buğda sahəsindən 31675 ton və ya hər hektardan 28 sentner, 5811 hektar arpa sahəsindən 15422 ton və ya hər hektardan 26,5 sentner məhsul götürülüb.
Dövlət Proqramına uyğun olaraq rayonun Çallı, İsaqbağı və Aşağı Seyidlər kəndlərində məktəb tikintiləri yekunlaşmaq üzrədir.
Dəli Quşçu kəndinin və Kür çayının daşmasından ziyan çəkmiş rayon əhalisi üçün Fövqəladə Hallar Nazirliyi tərəfindən inşa olunmuş 71 yeni yaşayış evinin qazlaşdırılması işləri tamamlanaraq təbii qazın verilməsi təmin olunub. Gəlmə, Salahlı, Xanməmmədli və Hüseynxanlı kəndlərində qaz xəttinin çəkilişi başa çatdırılıb və abonentlərə sayğac quraşdırılmasına başlanılıb.
Rayon Polis Şöbəsinin 2,3 milyon manat smeta dəyərində inzibati binasında tikinti işləri yüksək səviyyədə başa çatdırılıb, binanın açılışında Respublika Daxili İşlər nazirinin müavini Əsgər Ələkbərov iştirak edib.
Hazırda süd məhsulları istehsal edən zavod, “Aqrolizinq” Açıq Səhmdar Cəmiyyətinin rayon aqroservis filialı üçün inzibati bina, taxıl və gübrə anbarı, Baytarlıq idarəsinin binası, çoxsaylı sahibkarlıq obyektləri istifadəyə hazırdır.
Hesabat yığıncağında çıxış edənlər rayon rəhbərliyini əmin ediblər ki, qarşıdan gələn mühüm siyasi kampaniyada – prezident seçkilərində yüksək siyasi iradə nümayiş etdirərək ən layiqli namizədə səs verəcəklər.
Hesabat yığıncağında ayrı-ayrı sahələr daha ətraflı təhlil olunub, qarşıda duran vəzifələr müəyyənləşdirilib, müvafiq qərar qəbul olunub.
Sonda yığıncaq iştirakçıları adından Azərbaycan Respublikasının prezidenti İlham Əliyevə müraciət qəbul edilib.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
