Digər xəbərlər

Ana səhifə

Digər xəbərlər

Dünyanın müxtəlif ölkələrində Xocalı soyqırımının 15-ci ildönümü münasibətilə anım mərasimləri və aksiyalar keçirilir

26 fevral 2007 08:52 (UTC +04:00)

APA-nın Gürcüstan bürosunun məlumatına görə, Azərbaycanın Gürcüstandakı səfirliyinin təşkilatçılığı ilə keçirilən anım mərasimləri bu gün başa çatacaq. Tiflisdəki Azərbaycan Mədəniyyət Mərkəzində açılan sərgidə Xocalı faciəsini əks etdirən fotoşəkillər nümayiş olunub, “Xocalı - bir şəhərin faciəsi” adlı sənədli film göstərilib. Bu gün isə Mərcanaşvili adına Tiflis Dram Teatrının foyesində “Xocalıda soyqırımı” adlı fotosərgi açılıb. Teatrda bu gün “Torpağın fəryadı - Xocalı” ədəbi-bədii kompozisiyanın nümayişi nəzərdə tutulur.
Xocalı soyqırımının 15-ci ildönümü münasibətilə Stokholmda da anım mərasimləri keçirilib. Güney Azərbaycan Konqresi və Dünya Azərbaycanlıları Konqresinin birgə təşkilatçılığı ilə keçirilən anım mərasimlərində Xocalı soyqırımının qurbanlarının xatirəsi bir dəqiqəlik sükutla yad edilib. Stokholmda keçirilən mitinqlərdə hər iki təşkilatın Xocalı soyqırımının 15-ci ildönümü münasibətilə qəbul etdiyi müraciətlər müxtəlif dillərdə oxunub. Aksiya iştirakçıları şəhər ictimaiyyətinə Xocalı soyqırımını əks etdirən plakat, broşurlar və soyqırımı şəhidlərimizin şəkilləri paylanıb. Mitinq Ceyid Cəfər Pişəvərinin rəhbərlik etdiyi Azərbaycan Milli Hökumətinin himni ilə başa çatıb.
Xocalı faciəsinin ildönümü ilə əlaqədar Londonun “High Street Kensington” küçəsində sərgi təşkil olunub. APA-nın Şərqi Avropa bürosunun məlumatına görə, Böyük Britaniyada fəaliyyət göstərən Azərbaycanlı Gənclər Klubu, London Azərbaycan Cəmiyyəti, “Caspian-Xəzri” təşkilatı birgə keçirdiyi sərgi 3 saat davam edib. Təşkilatçılar London ictimaiyyətinə Xocalı faciəsi ilə bağlı kitab və bukletlər paylayıb, erməni işğalçılarının törətdikləri qanlı hadisələr barəsində məlumatlar veriblər.
Fevralın 25-də Xocalı faciəsinin 15-ci ildönümü ilə əlaqədar ABŞ-da və Kanadada fəaliyyət göstərən Azərbaycan diaspora təşkilatlarının bir qrupu Vaşinqtonda Ermənistan səfirliyinin önündə aksiya keçiriblər. Güney Azərbaycan Milli Oyanış Hərəkatından APA-ya verilən məlumata görə, piketdə Ermənistanın terroru dəstəkləyən dövlət olduğu vurğulanıb və Azərbaycan torpaqlarını işğal etməsi faktı pislənib. Aksiya iştirakçıları dünya ictimaiyyətindən və beynəlxalq təşkilatlardan Ermənistanın bu kimi cinayətlərinə hüquqi qiymət verilməsi də istəyib. Aksiyada qəbul edilən bəyanatda isə Ermənistandan işğalı sona çatdırılması da tələb edilib: “Qarabağın azad edilməsi həm də Güney Azərbaycan Milli Hərəkatının əsas məqsədlərindən biridir”.
Demokratik Dünya Azərbaycanlıları Konqresi də Xocalı soyqırımının 15-ci ildönümü münasibətilə müraciət qəbul edib. Müraciətdə dünya dövlətlərinin diqqəti 613 mülki şəxsin qətlə yetirildiyi Xocalı soyqırımına biganə qalmamaq tələb olunur. /APA/