Döyüş növləri

Döyüş növləri

Agasəlim Mircavadov: “Mario Jardelin Lənkərana gəlişi nağıla bənzəyir”

18 yanvar 2007 11:14 (UTC +04:00)

Birinci dövrəni lider kimi başa vuraraq, Birləşmiş Ərəb Əmirliklərinin Dubay şəhərinə iki həftəlik toplanışına yollanan Lənkəranın “Xəzər-Lənkəran” klubu bu gün səhər saatlarında vətənə qayıdıb. Klubun baş məşqçisi Ağasəlim Mircavadov APA-ya verdiyi açıqlamasında bildirib ki, Dubaydakı ilkin hazırlıq mərhələsini
qurduqları plan üzrə həyata keçiriblər: “Qarşımızda duran vəzifə ağır məşqlərdən sonra oyuna daxil olmaq idi. Üç mərhələyə bölünən toplanışın bu mərhələsində fiziki hazırlığa çox fikir verdik. Keçirdiyimiz yoxlama oyunları bizim üçün o mənada fərqli idi ki, ilk rəqibimiz olan İraq millisi ilə görüşə 8 günlük ağır məşqlərdən sonra çıxmışdıq. İkinci sınaq matçına gəlincə, “Əl-Hədda” Birləşmiş Ərəb Əmirliklərinin yuksək liqasında çıxış edir. Bu qarşılaşmaya 4 günlük məşqlərdən sonra çıxdıq. Futbolçuların hamısından razıyam. Onlar məşqlərdə həvəslə çalışaraq, yoldaşlıq görüşlərində yaxşı təsir bagışladılar. Dubaya gedib-gəlmək yorucu olsa da, hər halda, geri dönüb mühiti dəyişməliydik. Eyni zamanda, ağır məşqlərdən sonra futbolçulardan test-normativləri götürməliyik”. A. Mircavadov komandaya yeni transfer edilən Ceyhun Sultanovun hazırlıq prosesində yaxşı təsir bağışladığını, onun yarımmüdafiə xəttində Mahmud Qurbanovla birgə oyununun yaxşı alındığını vurğulayıb: “İstəyim komandada yarımmüdafiə xəttinin dinamik olması idi. Artıq bu problem həllini tapıb”. Baş məşqçi baxışa cəlb edilən belaruslu Sergey Pavlyukoviçlə litvalı Darius Jutautasın da oyunundan razı qaldığını bildirib: “Müdafiə xəttini yenidən qururuq. Martin Stankov komandadan gedib. Hazırda müdafiədə iki yeni legioner çıxış edir. Hər ikisi təcrübəli futbolçudur. Öz ölkələrinin yığma komandalarında çıxış ediblər. Sergey Pavlyukoviçi libero, Darius Jutautası isə müdafiənin sol cinahında sınadım. Onları komandaya götürmək fikrimiz var. Hazırda legionerlərin müqavilə məsələləri həll olunur. Bir-iki günə bu məsələ həll olunmalıdır. Dubaya ikinci səfərimizdə Pavlukoviçlə Jutautas rəsmən klubumuzun futbolçuları olacaq”. Hücumçu axtarışında olduğunu söyləyən baş məşqçi braziliyalı Mario Jardelin “Xəzər-Lənkəran”a keçəcəyi haqda yayılan xəbərləri təkzib edib: “İstərdim ki, yerli, gənc hücumçu transfer edək. Jardelin komandamıza gəlişi nağıla bənzəyir. Bu hücumçunu “Qalatasaray”da çıxış etdiyi dövrdən tanıyıram. Jardeli heyətimizdə görmək istəsək də, əsas məsələ onun Lənkərana gəlmək istəməsidir. Yarım milyon dollarlıq legioner Azərbaycan meydançalarında bu məbləğin əvəzini verməlidir”. /APA/