Döyüş növləri

Ana səhifə

Döyüş növləri

Mişel Platini UEFA prezidenti kimi görəcəyi işləri açıqlayıb

26 yanvar 2007 14:07 (UTC +04:00)

Avropa Futbol Assosiasiyaları İttifaqının (UEFA) yeni prezidenti Mişel Platini sələfi Lennart Yuhanssonun UEFA-nın Fəxri prezidenti adına layiq görülməsini təklif edib. “APA-Sport”un məlumatına görə, M. Platini 77 yaşlı L.Yuhanssonun UEFA prezidenti postunda 17 illik fəaliyyəti dövründə futbolun inkişafındakı rolunu qeyd etməklə yanaşı, bildirib ki, hörmət, dözümlülük, həmrəylik, azadlıq kimi idman dəyərlərinin keşiyində duraraq, futbolun muxtariyyətini qoruyacaq, dopinq və qeyri-leqal pul qoyuluşlarına qarşı mübarizə aparacaq.
M.Platini 1955-ci ilin 21 iyununda anadan olub. O, parlaq oyunçudan tanınmış futbol funksionerinədək ciddi karyera yolu keçib. Öz dövrünün ən güclü futbolçularından olan M. Platini 3 dəfə - 1983, 1984 və 1985-ci illərdə Avropanın ən güclü futbolçusu seçilib. Futbolçu karyerasına Fransanın “Nansi” komandasında başlayan M.Platini ilk dəfə 1979-cu ildə “Sent-Etyen”in heyətində məşhurlaşmağa başlayıb. “Yuventus” klubunun heyətində (1982-1987) İtaliyanın futbol üzrə daxili yarışlarında çoxlu mükafat kolleksiyası toplamaqla yanaşı, Avropa miqyaslı yarışlarda Çempionlar Kubokunu (1984/85) və UEFA Superkubokunu (1985) əldə edib. 1983, 1984 və 1985-ci illərdə İtaliya A seriyasının ən məhsuldar hücumçusu olub. O, Fransa yığmasının heyətində də az uğur qazanmayıb. 1984-cü ildə Avropa çempionu tituluna sahib çıxan M. Platini 3 dünya çempionatında (1978, 1982 və 1986) iştirak edib. Ümumiyyətlə, 1976-cı ildən 1987-ci ilədək ölkəsinin yığma komandasının heyətində keçirdiyi 72 oyunda 41 qol vurub. Bu görüşlərin 49-da M. Platini meydana kapitan sarğısı ilə çıxıb. Karyerasını bitirdikdən sonra 1988 - 1992-ci illərdə Fransa millisinin baş məşqçisi postunda çalışıb. Daha sonra M.Platini siyasətçi və futbol funksioneri kimi fəaliyyət göstərib. O, 1998-ci ildə Fransada keçirilən dünya çempionatının təşkilat komitəsi sədrinin müavini olub. 2002-ci ildən FİFA və UEFA-nın İcraiyyə Komitələrinin üzvüdür. UEFA-nın texniki inkişaf komitəsinin sədri və Fransa Futbol Federasiyasının vitse-prezidentidir. /APA-Sport/