Döyüş növləri

Ana səhifə

Döyüş növləri

Mübariz Mənsimov: “Hər kəs öz pulunu saysa, daha yaxşı olar”

16 fevral 2007 17:30 (UTC +04:00)

- “Xəzər-Lənkəran” klubu ilə bağlı layihələrinizdən hansı yerinə yetirilməmiş qalıb?
- Fikrimcə, layihələrimizi hamı görüb. Baxmayaraq ki, cəmi üç ildir yaranıb, komandam hazırda ölkənin ən güclülərindən biridir. Qısa zamanda ən müasir stadion inşa etdirmişik. Futbolçuların təlim-məşq keçməsi üçün ən yaxşı imkanlar yaradılıb. Rəhbərlik yalnız maddi cəhətdən deyil, mənəvi cəhətdən də hər zaman futbolçuların yanındadır. İnşallah, bunun daimi olması üçün hər şeydən öncə Azərbaycan çempionu olmalıyıq ki, Avropada ölkəmizi layiqincə təmsil edək. Avropa kuboklarında mərhələ keçdikcə, komandaya yeni futbolçular cəlb edəcəyik. Bununla yanaşı, Bakıda 8-14 yaşlı uşaqlar üçün futbol məktəbi də yaradacağıq.
- Futbol məktəbinin nə vaxt açılacağı gözlənilir?
- Məncə, bu il açılacaq. Klubun digər rəsmiləri bu işlə məşğuldurlar.
- Bakıda stadion problemi var...
- Biz stadionları təlim-məşq toplanışları üçün icarəyə götürəcəyik. Hazırda münasib stadion axtarırıq.
- Baş məşqçi Ağasəlim Mircavadovun fəaliyyətindən razısınız?
- Azərbaycanın ən yaxşı məşqçisidir. Onun haqqında yaxşı sözlərdən başqa heç nə danışmaq olmaz. Bunu bütün Azərbaycan bilməlidir.
- Ağasəlim Mircavadovla komandanızın sabiq baş məşqçisi Rasim Karanı müqayisə edə bilərsiniz?
- Rasim mənim dostumdur. Onun kimi mütəxəssisin Azərbaycanda çalışması müsbət amildir.
- Bakıya gəlişinizin səbəbi nə ilə bağlıdır?
- Atamın adı gününə gəlmişəm.
- “Neftçi” - “Xəzər-Lənkəran” oyunu xoşunuza gəldi?
- Bəli, hər iki komanda yaxşı oyun nümayiş etdirdi.
- Komandanızın oyununu sonuncu dəfə nə vaxt izləmisiniz?
- İlk dövrənin sonuncu görüşlərindən birinə baxmışdım.
- Necə hesab edirsiniz, komandanız bu oyunla çempionluğa layiqdir?
- Məncə, layiqdir. Azərbaycanın ən güclü klublarından biri olan “Neftçi” ilə oynayırıq.
- Futbolçularınıza çox pul verdiyinizi söyləyirlər...
- Hər kəs öz pulunu saysa, daha yaxşı olar. Mən bilərəm, kimə nə qədər pul verirəm. Hesab etmirəm ki, komandamda kimsə əbəs yerə pul alır. Çıxıb oynayıb, layiq olduqları pullarını alırlar.
- Çempionluğa iddia etsəniz də, komandanızdan milliyə az futbolçu çağırılır...
- Bu, baş məşqçinin seçimidir. Layiq görmür ki, çağırmır.
- Əgər komandanızdan milliyə futbolçu çağırılmırsa, belə çıxmırmı ki, futbolçularınız zəifdir?
- Mən bu sahədə mütəxəssis deyiləm. Yəqin ki, layiq görmürlər. Hər bir şəxs öz işi ilə məşğul olsa, yaxşıdır. Çağırırlarsa, layiqdirlər, çağırılmırlarsa, demək layiq deyillər.
- Ermənistan Azərbaycan yığmasının ardınca, Türkiyənin gənclər millisi ilə də eyni qrupda mübarizə aparmalıdır. Sizcə, bu UEFA-nın məqsədyönlü siyasəti deyil?
- Mən siyasətçi deyil, iş adamıyam. Belə şeylərlə qarışmıram.
- Azərbaycan Ermənistan görüşləri harada keçirilməsini təklif edərdiniz?
- Qarabağda!
- Çempionatın səviyyəsi sizi qane edirmi?
- Yox, Azərbaycan çempionatının səviyyəsi çox aşağıdır.
- Legioner limiti ilə bağlı fikirlərinizi bilmək maraqlı olardı...
- Bəlkə də AFFA bu qərarı yerli futbolçuları düşünərək verib. Əcnəbiləri milliləşdirib oynatmaqdansa, azərbaycanlı oyunçular yetişdirmək daha yaxşı olardı.
- Komandanızın çempion olması ilə hədəflərinizi bitmiş saymaq olarmı?
- Xeyr. Çempion olmaqla, hədəflərimizin yalnız 15 faizini həyata keçirmiş olarıq. “Xəzər-Lənkəran” yalnız Azərbaycan çempionu olmaq üçün yaradılmayıb. Məqsədimiz Azərbaycanı dünyada tanıtmaqdır.
- Bundan sonra da Azərbaycana yalnız prinsipial oyunlara baxmağa gələcəksiniz?
- Yox, hər zaman “Xəzər-Lənkəran”ın yanındayam. Mən oyunları hər zaman izləyirəm. Bunun üçün Azərbaycana gəlib-getməyim vacib deyil.
- Türkiyədə müğənni dostlarınız var. Onları klubunuzun reklamı məqsədilə Azərbaycana gətirmək fikriniz yoxdur?
- Futbol özü-özünü reklam etməlidir. Futbolçular çıxıb oyunları ilə azarkeşlərin rəğbətini qazanmalıdırlar. Məncə, bu vaxtadək Azərbaycan çempionatında stadionlara indiki kimi çox azarkeş gəlməyib.
- Amma bir o qədər də maraqlı oyun deyil...
- Deməzdim ki, maraqsız oyundur. İkinci dövrədə ilk oyunumuzdur. Tribunadan baxıb oyunun maraqsız keçdiyini söyləmək düzgün deyil.
- Türkiyə klublarını Azərbaycana dəvət etmək fikriniz yoxdur?
- Komandam çempion olandan sonra, Türkiyə çempionatının qızıl medalçısını Lənkərana dəvət edib, bu komanda ilə yoldaşlıq oyunu keçirəcəyik. /APA-Sport/