Döyüş növləri

Ana səhifə

Döyüş növləri

Elman Rüstəmov: “Strategiyamız Bakını dünyanın şahmat mərkəzlərindən birinə çevirməkdir”

18 aprel 2008 10:27 (UTC +04:00)

Bakı. Kənan Həsənov APA-SPORT. “Qran-Pri turnirinin Bakıda keçirilməsi şahmatın Azərbaycanda daha da kütləvi hal almasına xüsusi töhfə verəcək. Ən güclü qrossmeysterlər sırasında üç həmyerlimiz də iştirak edəcək. Bu, böyük uğurdur. Yarışın Bakıda keçirilməsi idmanımızın və ölkəmizin paralel inkişaf etməsinin göstəricisidir. Strategiyamız Bakını dünyanın şahmat mərkəzlərindən birinə çevirməkdir. Bundan sonra da nüfuzlu yarışları təşkil edəcəyik”.
“APA-Sport” agentliyinin məlumatına görə, bu sözləri Milli Bankın İdarə Heyətinin sədri, Azərbaycan Şahmat Federasiyasının prezidenti Elman Rüstəmov deyib. Bu gün keçirilən mətbuat konfransında E.Rüstəmov bildirib ki, istedadlı şahmatçılara hərtərəfli dəstək vermək üçün xüsusi planlar hazırlanır: “Biz şahmata menecment gətirmək istəyirik. Çünki idmançılarımızın böyük istedadları və iddiaları var. Onlara daim dəstək olacağıq. Konkret elitaya daxil olan Şəhriyar Məmmədyarovla Teymur Rəcəbova hər məsələdə kömək edirik. Hazırda isə bu şahmatçıları xüsusi komanda ilə təmin etmək haqda düşünürük. Yəqin ki, yaxın aylarda bu istiqamətdə lazımi addımlar atacağıq. Şahmatın İnkişafı ilə bağlı Dövlət Proqramının qəbulu da bu yaxınlarda reallaşacaq. Artıq sənəddə əksini tapan bütün müddəalar razılaşdırılıb. Bakıda Şahmat Akademiyasının yaradılması da, bura daxildir”.