Döyüş növləri

Ana səhifə

Döyüş növləri

AFFA-nın İcraiyyə Komitəsinin yeni üzvləri və vitse-prezidentləri müəyyənləşib

28 aprel 2008 11:32 (UTC +04:00)

Bakı. Mehman Süleymanov APA-Sport. Bu gün AFFA-nın növbəti hesabat-seçki konfransı işinə başlayıb. “APA-Sport” agentliyinin məlumatına görə, assosiasiyanın inzibati binasında keçirilən iclasda gənclər və idman naziri Azad Rəhimovun da iştirakı gözlənilsə də, nazir qeyri-müəyyən səbəbdən toplantıya qatılmayıb.
Mandat Komissiyasının sədri Cavanşir Yusifovun verdiyi məlumata əsasən, AFFA-nın üzvü olan 30 səlahiyyətli nümayəndənin hamısı konfransa qatılıb. Say Komissiyasının tərkibi müəyyənləşib ki, bu da Fərid Novruzi, Musa Qurbanov və Rasim Zeynalovdan ibarət olub. AFFA-nın baş katibi Elxan Məmmədov assosiasiyanın hesabat ili haqda videorolikin hazırlandığını bildirib. Konfrans iştirakçıları roliki izlədikdən sonra müstəqil audit təşkilatının sədri Tahir Əkbərov çıxış edib və hesabat ilinin yekununa görə, müsbət audit rəyi verildiyini söyləyib. Maliyyə vəsaitinin təyinatı üzrə xərcləndiyini deyən T.Əkbərov ciddi nöqsanlara yol verilmədiyini qeyd edib. Hesabat ili zərərlə başa vurulduğu üçün mənfəət əldə edilmədiyi də vurğulanıb. AFFA-nın 2008-ci il büdcəsi haqda məlumat verən assosiasiyanın baş mühasib əvəzi Kəmalə Yusifovanın verdiyi proqnoza görə, gəlirlər və xərclər eyni məbləğdə 10350000 manat olacaq. Assosiasiyanın builki büdcəsi 20700000 manat təşkil edir.
Sonra İcraiyyə Komitəsinə (İK) seçkilər keçirilib. 10 yer uğrunda mübarizəyə 15 nəfər qoşulub. AFFA-nın Nizamnaməsinə əsasən, qurumun tərkibində AFFA-nın prezidenti Rövnəq Abdullayevi nəzərə almasaq, 10 nəfər yer alacaq. R.Abdullayev prezident seçildiyi üçün İK-ya avtomatik üzv seçilib. Konfransda İK üzvləri ilə yanaşı, vitse-prezidentlərin seçilməsi də nəzərdə tutulub.

Keçirilən səsvermədən sonra yeni İcraiyyə Komitəsinin üzvləri müəyyənləşib.

Peşəkar Futbol Liqası 4 yer

1. Rauf Əliyev “Neftçi” PFK
2. Hafiz Məmmədov “Bakı” FK
3. Ələkbər Məmmədov “İnter” PİK
4. Kazbek Tuayev “Simurq” FK

Regional Futbol Federasiyaları 2 yer

1. Cahangir Hacıyev Bakı FF
2. Elmar Qasımov Mərkəz RFF

Sahə Futbol Təşkilatları 2 yer

1. Mahir Məmmədov Çimərlik FF
2. Mirkamil Rəhimov Uşaq və Gənclər FF

İctimai təşkilatlar 2 yer

1. Elşad Nəsirov Futbolsevərlər Birliyi
2. İsgəndər Cavadov Futbolçular Birliyi

Daha sonra İcraiyyə Komitəsinin yeni tərkibdə ilk iclası keçirilib. Toplantıda assosiasiyanın vitse-prezidentləri seçilib. 2003-cü ilin dekabrın 30-da keçirilən hesabat-seçki konfransında olduğu kimi, Rauf Əliyev birinci vitse-prezident, Elşad Nəsirov vitse-prezident olub. AFFA-nın prezidenti Rövnəq Abdullayev onların namizədliyini irəli sürdükdən sonra səsvermə keçirilib və əvvəlki vitse-prezidentlərin fəaliyyətini davam etdirməsi rəsmiləşib.