Bakı. Etibar Məmmədov – APA. Milli QHT Forumu (MQF) və Azərbaycanlıların və digər Türkdilli Xalqların Əməkdaşlıq Mərkəzinin (ATXƏM) təşkilatçılığı ilə Azərbaycanda fəaliyyət göstərən 100-dən artıq QHT Xocalı soyqırımının 21-ci ildönümünə həsr olunmuş tədbir keçirib. APA-nın məlumatına görə, tədbirdə çıxış edən MQF prezidenti Rauf Zeyni bildirib ki, Xocalı faciəsi dünyada hələlik lazımi qiymət almasa da, Azərbaycanın bu istiqamətdə apardığı mübarizə öz nəticəsini verir: “Biz Xocalı soyqırımının tanınması istiqamətində beynəlxalq təşkilatlarla əlaqələrimizi gücləndiririk. Dünyanın müxtəlif şəhərlərində təşkil edilən aksiyalar, etirazlar və tədbirlərin nəticəsi bu gün görünməkdədir”.
ATXƏM sədri İlham İsmayılov QHT-lərin və Azərbaycan ictimaiyyətinin artıq 20 ildir soyqırım aktının beynəlxalq arenada tanınması üçün mütəmadi olaraq mübarizə apardığını bildirib. O qeyd edib ki, bu gün Avropanın müxtəlif şəhərlərində Xocalı soyqırımının tanınması üçün etiraz aksiyaları keçirilir və gec-tez dünya ictimaiyyəti bu fakta hüquqi qiymət verəcək.
Prezident Administrasiyası İctimai-siyasi şöbəsinin diaspora ilə iş sektorunun müdiri Qafar Əliyev Azərbaycanın ərazi bütövlüyünün bərpası işinin yalnız möhkəm daxili ictimai-siyasi sabitlikdən keçdiyini vurğulayıb.
Tədbirin sonunda QHT-lər birgə bəyanatla çıxış edərək, soyqırımın tanınması və hüquqi qiymət verilməsi üçün BMT-yə, Avropa Şurasına və digər beynəlxalq təşkilatlara müraciət etməyi qərara alıblar.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
