Bakı. Məlahət Nəcəfova-APA. Bakıda Türkiyə səfirliyinin, TRT-nin və Anadolu Agentliyinin təşkilatçılığı ilə 15 iyul tarixində Türkiyədə dövlət çevrilişinə cəhdlə bağlı çəkilmiş "Xəyanətdən qələbəyə" sənədli filmin təqdimat mərasimi keçirilib.
APA-nın məlumatına görə, tədbirdə Azərbaycanın ictimai-siyasi nümayəndələri, media rəhbərləri və digər qonaqlar iştirak ediblər.
Əvvəlcə Türkiyə və Azərbaycanın müstəqilliyi uğrunda şəhid olmuş şəxslərin xatirələri bir dəqiqəlik sükutla anılıb. Ardınca hər iki ölkənin dövlət himni səslənib. Mərasimdə çıxış edən TİKA-nın Bakı üzrə proqram koordinatoru Adəm Urfa bu tədbirlə 15 iyul zamanı Türkiyənin nə dərəcədə böyük təhlükəni aradan qaldırıldığını göstərmək istədiklərini bildirib. O, bu mübarizədə Azərbaycanln da Türkiyənin yanında olduğunu qeyd edib.
Daha sonra çıxış edən Anadolu Agentliyinin Asiya və Qafqaz üzrə bölgə müdiri Tolqa Özgenç 15 iyul gecəsi Azərbaycan xalqının da Türkiyə xalqı kimi yuxusuz qaldığını bildirib: "15 iyul bizim üçün böyük sınaq idi. Biz artıq FETÖ-nun necə bir təhlükəli təşkilat olduğunu anlayırıq. Bunu dost və qardaş bildiyimiz ölkələrə də anlatmaq istəyirik". Ardınca çıxış edən TRT-nin Bakı nümayəndəliyinin rəhbəri Yıldıray Arslan çıxışında bu tədbirlə türk xalqının canı ilə qarşısını aldığı hadisəni Azəbaycan xalqına çatdırmaq olduğunu bildirib.
Azərbaycan Prezidenti Administrasiyasının ictimai-siyasi şöbəsinin əməkdaşı Bəhruz Həsənov çıxışında Azərbaycanda 15 iyul hadisələrinin hər dəqiqəsinin həyəcanla izlənildiyini deyib. O bildirib ki, Azərbaycan prezidenti dərhal hadisə ilə bağlı qətiyyətli mövqeyini bildirib, hadisəni dövlət çevrilişi adlandırıb: "Türkiyənin FETÖ ilə mübarizəsi Azərbaycan tərəfindən dəstəklənir".
Ardınca çıxış edən Türkiyənin Azərbaycandakı səfiri İsmayıl Alper Coşqun çevrilişə cəhdin ilk dəqiqələrindən Azərbaycanın Türkiyənin yanında olduğunu bildirib. Onun sözlərinə görə, Türkiyə Azərbaycanın bu məsələdə mövqeyindən məmnundur və FETÖ-yə qarşı birgə mübarizəni davam etdirəcək.
Daha sonra sənədli film nümayiş olunub. Tədbirdə 15 iyul hadisəsini əks etdirən fotolardan ibarət sərgi təşkil olunub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
