İqtisadi

Bakı. Musa Əhmədov - APA-Economics. 2016-cı ilin II rübündə fiziki şəxslər tərəfindən pulköçürmə sistemləri vasitəsilə Rusiya və Azərbaycan arasında transsərhəd pulköçürmələrin həcmi 239 mln. dollar təşkil edib.

“APA-Economics” Rusiyanın Mərkəzi Bankına istinadən xəbər verir ki, bu, 2015-ci ilin müvafiq dövrü ilə müqayisədə 63 mln. ABŞ dolları və ya 20,86% azdır.

Hesabat dövründə fiziki şəxslər tərəfindən Azərbaycandan Rusiyaya hər əməliyyat üzrə orta hesabla 589 ABŞ dolları olmaqla ümumilikdə 36 mln. dollar məbləğində vəsait köçürülüb ki, bunun da 25 mln. dolları rezident fiziki şəxslərin, 11 mln. dolları isə qeyri-rezident fiziki şəxslərin payına düşüb.

Bu ilin 6 ayı ərzində Rusiyadan Azərbaycana hər əməliyyat üzrə orta hesabla 381 ABŞ dolları olmaqla ümumilikdə 203 mln. dollar vəsait daxil olub ki, bunun da 105 mln. dolları rezident fiziki şəxslərin, 98 mln. dolları isə qeyri-rezident fiziki şəxslərin payına düşüb.

Statistikaya nəzər salanda məlum olur ki, bu ilin yanvar-iyun ayları ərzində fiziki şəxslər tərəfindən pulköçürmə sistemləri ilə Rusiyadan Azərbaycana daxil olan vəsaitin həcmi əks istiqamətdə göndərilən vəsaiti 5,6 dəfə üstələyir.

Xatırladaq ki, 2015-ci ilin II rübündə fiziki şəxslər tərəfindən Azərbaycandan Rusiyaya hər əməliyyat üzrə orta hesabla 801 ABŞ dolları olmaqla ümumilikdə 55 mln. dollar məbləğində vəsait köçürülüb ki, bunun da 38 mln. dolları rezident fiziki şəxslərin, 17 mln. dolları isə qeyri-rezident fiziki şəxslərin payına düşüb. Həmin dövrdə Rusiyadan Azərbaycana hər əməliyyat üzrə orta hesabla 507 ABŞ dolları olmaqla ümumilikdə 247 mln. dollar vəsait daxil olub ki, bunun da 140 mln. dolları rezident fiziki şəxslərin, 107 mln. dolları isə qeyri-rezident fiziki şəxslərin payına düşüb.

Ümumiyyətlə, 2016-cı ilin II rübündə pul köçürmə sistemləri vasitəsilə Rusiya və Azərbaycan arasında transsərhəd pulköçürmələrin həcmi 159 mln. dollar təşkil edib. Bu, 2015-ci ilin II rübü ilə müqayisədə 66 mln. ABŞ dolları və ya 29,33% azdır.

İllik göstəricidə azalma olsa da, bu ilin II rübünü I rübü ilə müqayisə edəndə məlum olur ki, aprel-iyun aylarında pul köçürmə sistemləri vasitəsilə Rusiya və Azərbaycan arasında pul köçürmələrin həcmində 56 mln. ABŞ dolları və ya 54,37%-lik artım olub. Xatırladaq ki, Rusiya və Azərbaycan arasında pul köçürmələrin həcmi I rübdə 103 mln. dollar idisə, II rübdə 159 mln. dollar olub.

Məlumata görə, bu ilin II rübündə Rusiyadan Azərbaycana 137 mln. ABŞ dolları həcmində vəsait köçürülüb ki, bu da 2015-ci ilin eyni dövrü ilə müqayisədə 53 mln. ABŞ dolları və ya 63,1% çoxdur. Bu ilin aprel-iyun aylarında şimal qonşumuzdan ölkəmizə hər əməliyyat üzrə orta hesabla 490 ABŞ dolları köçürülüb. Xatırladaq ki, 2015-ci ilin II rübündə transsərhəd pul köçürmə sistemləri vasitəsilə Rusiyadan Azərbaycana 84 mln. ABŞ dolları göndərilib. Bu zaman hər əməliyyat üzrə pul köçürmənin orta məbləği 354 ABŞ dolları olub.

Bu ilin II rübündə Azərbaycandan Rusiyaya pul köçürmələrinin həcminə gəlincə, illik müqayisədə burda azalma müşahidə olunub. Belə ki, 2016-cı ilin aprel-iyun aylarında hər əməliyyat üzrə orta məbləğ 460 ABŞ dolları olmaqla Azərbaycandan şimal qonşumuza ümumilikdə 22 mln. ABŞ dolları həcmində pul köçürülüb. Bu isə 2015-ci ilin müvafiq dövründəkindən 13 mln. ABŞ dolları və ya 37,14% azdır. Başqa sözlə, 2015-ci ilin II rübündə Azərbaycandan Rusiyaya hər əməliyyat üzrə orta məbləğ 568 ABŞ dolları olmaqla ümumilikdə 35 mln. ABŞ dolları həcmində vəsait daxil olub.

Azərbaycandan Rusiyaya pul köçürmələrinin həcminə görə, bu ilin II rübünü I rübü ilə müqayisə edəndə məlum olur ki, aprel-iyun aylarında şimal qonşumuza pul axını 3 mln. ABŞ dolları və ya 15,79% artıb. Belə ki, I rübdə Azərbaycandan Rusiyaya 19 mln. ABŞ dolları həcmində pul köçürülübsə, II rübdə bu göstərici 22 mln. ABŞ dollarına qədər artıb. I rübdə hər əməliyyat üzrə orta məbləğ 461 ABŞ dolları, II rübdə isə 460 ABŞ dolları təşkil edib.

Bu ilin II rübündə Rusiyadan fiziki şəxslər tərəfindən pul köçürmə sistemləri vasitəsilə transsərhəd pulköçürmələrinin həcminə görə, MDB ölkələri arasında ilk yerdə Özbəkistan, sonuncu yerdə isə Türkmənistan qərarlaşıb. Belə ki, 2015-ci ildə Rusiyadan Özbəkistana 2 370 mln. ABŞ dolları, Türkmənistana isə 16 mln. ABŞ dolları məbləğində vəsait göndərilib. Azərbaycan siyahıda 6-cı yerdə dayanıb.

2016-cı ilin II rübündə fiziki şəxslər tərəfindən pul köçürmə sistemləri vasitəsilə Rusiya MDB ölkələri arasında transsərhəd pulköçürmələrin həcmi

		Rusiyaya köçürmələr		Rusiyadan köçürmələr		Dövriyyə
		Köçürmələrin məbləği ( mln, ABŞ) dolları)	Bir köçürmənin orta məbləği (ABŞ dolları)	Köçürmələrin məbləği, mln. ABŞ dolları	Bir köçürmənin orta məbləği (ABŞ dolları)	Köçürmələrin məbləği, mln. ABŞ dolları
MDB ölkələri		355	490	1536	367	1891
	Özbəkistan	21	1 172	474	423	494
	Qırğızıstan	71	800	298	480	370
	Qazaxıstan	130	512	100	738	230
	Ukrayna	23	220	178	262	201
	Tacikistan	28	402	156	202	185
	Azərbaycan	22	460	137	490	159
	Ermənistan	20	1 029	91	377	111
	Moldova	11	483	67	347	78
	Belarus	17	254	33	240	50
	Türkmənistan	11	372	3	387	14