Aprelin 6-da Qəzza zolağının sərhədində İsrail hərbçiləri ilə toqquşmalarda ölən fələstinlilərin sayı 9 nəfərə çatıb.
APA-nın RİA Novosti agentliyinə istinadən verdiyi xəbərə görə, bu barədə Fələstinin BMT-dəki daimi müşahidəçisi Riyad Mənsur bildirib.
“Ölənlərdən 1-i uşaqdır. Xəsarət alanların sayı isə 1000 nəfəri keçib. Martın 30-dan etibarən Qəzza zolağının sərhədində ölən fələstinlilərin sayı 30-a çatıb, 2 500-dən çoxu yaralanıb”, deyə R.Mənsur qeyd edib. İsrail hökuməti bölgədə vəziyyətin gərginləşməsində “HƏMAS”ı günahlandırıb.
***
21:11
Bu gün Qəzza zolağının sərhədində İsrail hərbçiləri ilə toqquşmalarda ölən fələstinlilərin sayı 5 nəfərə çatıb.
APA-nın məlumatına görə, bu barədə “RİA Novosti” agentliyinə Fələstin Səhiyyə Nazirliyinin nümayəndəsi Əşrəf əl-Kidra bildirib.
Onun sözlərinə görə, ümumilikdə iğtişaşlar zamanı 922 fələstinli yaralanıb, onlardan 218-i güllə yarası alıb.
***
20:14
Bu gün Qəzza zolağının sərhədində İsrail hərbçiləri ilə toqquşmalarda 3 fələstinli nəfər ölüb, 350-si müxtəlif dərəcəli xəsarət alıb.
APA-nın məlumatına görə, bu barədə “RİA Novosti” agentliyinə Fələstin Səhiyyə Nazirliyinin nümayəndəsi Əşrəf əl-Kidra bildirib.
“Bu gün saat 18:00 üçün olan məlumata əsasən, İsrail ordusunun açdığı atəş nəticəsində 3 fələstinli ölüb, 117-si güllə yarası almaqla, 350 fələstinli yaralanıb”, deyə Ə.əl-Kidra qeyd edib.
Qeyd edək ki, keçən həftənin cümə günü fələstinlilər Qəzza zolağının sərhədində “Böyük Qayıdış Yürüşünə" başlayıb. Fələstinlilər aksiyanın mayın ortalarınadək davam edəcəyini bəyan ediblər.