Bakı. Gülnar Bəşirova - APA. Azərbaycan Milli Elmlər Akademiyası (AMEA) Nəsimi adına Dilçilik İnstitutu Azərbaycan dilinin tətbiqi vəziyyətini və normaların pozulması hallarını müəyyənləşdirmək məqsədilə monitorinqlər keçirəcək.
AMEA-nın mətbuat xidmətindən APA-ya verilən məlumata görə, institut şəhər və rayonların icra hakimiyyətləri ilə müqavilələr bağlayacaq. Məsələ ilə əlaqədar AMEA Rəyasət Heyətinin iclasında qərar qəbul olunub.
Tədbirdə AMEA prezidenti, akademik Akif Əlizadə prezident İlham Əliyevin imzalamış olduğu “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın xüsusi əhəmiyyətə malik sənəd olduğunu bildirib: “Azərbaycan dilinin inkişafı, tətbiqi və istifadəsi ilə bağlı bir sıra tədbirlərin həyata keçirilməsini nəzərdə tutur. Bununla əlaqədar Dilçilik İnstitutu monitorinqlər çərçivəsində afişa və elanlarda, həmçinin dövlət və özəl qurumların sənədlərində nöqsanları müəyyənləşdirəcək, nəticədə onların aradan qaldırılması istiqamətində müvafiq işlər görüləcək”.