Bakı - APA. İyunun 13-də Heydər Əliyev Mərkəzində İspaniyanın flamenqo qrupu tamaşaçılara məşhur “Karmen” əsərini yeni quruluş-caz, ərəb musiqisi elementləri, salsa və flamenqo rəqsinin sintezi ilə təqdim edəcək.
Heydər Əliyev Mərkəzindən APA-ya verilən məlumata görə, fransız yazıçı Prosper Merimenin və bəstəkar Corc Bizenin “Karmen” operası əsasında səhnələşdirilmiş şou Antonio Andrade və onun qrupu tərəfindən müasir flamenqo ruhunda hazırlanıb.
İki saata yaxın davam edəcək flamenqo gecəsində izləyicilərə möhtəşəm vokal ifa və rəqs performansları təqdim olunacaq.
Bildirilib ki, şouda Karmen obrazını Malaqa şəhərindən olan rəqqasə və xoreoqraf Ursula Moreno yaradır. Unikal ifa texnikası, təkrarolunmaz plastikası və unikal aktyorluq qabiliyyətinə görə onu “müasir flamenqonun ümidi” adlandırırlar. Malaqada Musiqi və Rəqs Kral Akademiyasını bitirmiş, bir sıra flamenqo ustadlarından dərs alımış rəqqasə karyerası ərzində bir sıra uğurlara imza atıb. O, 2010-cü ildə Ronda Milli Flamenqo Müsabiqəsində ikinci yerə, 2011-ci ildə isə həmin yarışmada “Ən yaxşı Kanya rəqqasəsi” mükafatına layiq görülüb. Malaqada Flamenqo Mədəniyyət Mərkəzinin təsisçisi və rəhbəri olan Ursula Moreno hazırda pedaqoqluq fəaliyyəti göstərir, eyni zamanda Antonio Andradenin truppasında solo karyerasını davam etdirir.
Qrupun rəhbəri Antonio Andrade Sevilya yaxınlığında yerləşən və flamenqo ənənələri güclü olan Pueble-de-Kasalya kəndində anadan olub. O, bu qədim incəsənət növünün təsirində böyüyüb və kiçik yaşlarından gitara çalmağa başlayıb. Karyerası boyu tanınmış flamenqo ustaları ilə birgə çalışan Antonio Andrade Avropa ölkələri, ABŞ, Yaponiyada verdiyi konsertlərlə tamaşaçıların rəğbətini qazanıb.
Müasir “Karmen” şousunun debütü 1998-ci ildə Berlində “Alman Opera Evi”ndə olub. Səhnə performansının Bakıdan sonra Danimarka və İsveçrədə təqdimatları nəzərdə tutulur.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
