Bakı. Fərid Mirzəyev – APA. Avropa İttifaqının maliyyələşdirdiyi “SOCEİUX” layihəsi çərçivəsində icbari tibbi sığorta və səhiyyə islahatları üzrə ekspertlər Mişel Villak, Erika Riçardson, Andrey Nazirlər Kabineti yanında İcbari Tibbi Sığorta üzrə Dövlət Agentliyinin dəvəti ilə Bakıya gəlib. Bu barədə APA-ya Agentliyin mətbuat xidmətindən məlumat verilib.
Bildirilib ki, ekspertlər Agentlikdə keçirilən görüşlərdə dünyada səhiyyənin maliyyələşmə yolları ilə bağlı təqdimat ediblər: “İcbari tibbi sığorta sisteminin ödəmə metodları, Azərbaycanda icbari tibbi sığortanın tətbiqi üçün aparılmalı olan islahatlar müzakirə mövzusu olub”.
Qeyd olunub ki, bir həftə davam edən görüşlərdə Agentliyin mütəxəssisləri MDB və Avropa ölkələrinin icbari tibbi sığorta sistemləri haqqında söhbət açıblar: “Azərbaycanın hansı ölkələrin təcrübəsindən yararlana biləcəyini, həmin ölkələrdə icbari tibbi sığorta sistemi qurularkən ortaya çıxan çətinlikləri və eyni problemlərlə üzləşməmək üçün önləyici tədbirlərin həyata keçirilməsi haqda fikir mübadiləsi aparıblar. Ekspertlər “SOCEİUX” layihəsi çərçivəsində Azərbaycanda icbari tibbi sığortanın tətbiqi ilə bağlı görülməli tədbirlər və mərhələli olaraq aparılmalı islahatlarla bağlı fəaliyyət planı hazırlayırlar”.
“İcbari Tibbi Sığorta üzrə Dövlət Agentliyinin direktoru Zaur Əliyev icbari tibbi sığortanın ayrı-ayrı komponentləri üzrə daha detallı araşdırmaların aparılması və Azərbaycana texniki dəstəyin göstərilməsini ekspertlərlə razılaşdırıb. Bugünkü görüşdə Nazirlər Kabinetinin sosial məsələlər şöbəsinin müdiri Musa Ələkbərov da iştirak edib” – deyə məlumatda bildirilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
