Türkiyədə saxlanılanlar arasında “Fənərbaxça”nın futbolçusu Mert Hakan Yandaş və “Qalatasaray”ın oyunçusu Metehan Baltacı da var.
APA-nın NTV-yə istinadən xəbərinə görə, İstanbul Baş Prokurorluğu tərəfindən aparılan və ictimaiyyətə “Futbol mərc oyunları araşdırması” kimi tanınan işin ikinci hissəsi çərçivəsində “Qalatasaray”ın futbolçusu Metehan Baltacının öz klubunun oyunlarına mərc etdiyi aşkarlanıb.
Eyni zamanda, “Fənərbaxça”nın futbolçusu Mert Hakan Yandaşın başqası vasitəsilə qanuni mərc oyunlarında iştirak etdiyi məlum olub.
Bundan başqa, 28 aprel 2024-cü ildə keçirilmiş “Ankaraspor”-“Nazilli Belediyespor” matçının nəticəsinə təsir etmələri səbəbi ilə “Ankaraspor” klubunun sahibi Əhməd Okatan, “Ankaraspor” klubunun prezidenti Mehmet Emin Katipoğlu, “Nazilli Belediyespor” prezidenti Şahin Kaya və iki məşqçi tutulub.
24 dekabr 2023-cü ildə keçirilmiş “Ümraniyespor”-“Giresunspor” futbol matçının nəticəsinə təsir etmələri səbəbi ilə biri futbolçu olmaqla altı nəfər, habelə bank hesabları araşdırılan və şübhəli maliyyə əməliyyatlarının aparıldığı müəyyənləşən “Adana Demirspor” klubunun keçmiş prezidenti Murat Sancak, keçmiş futbol hakimi və idman şərhçisi Ahmet Çakar və həyat yoldaşı, eləcə də baş hakim Zorbay Küçük də daxil olmaqla yeddi nəfər saxlanılıb.
Ümumilikdə 46 nəfər barəsində saxlanılma qərarı çıxarılıb, 35-i tutulub.
***
11:32
İstanbul Baş Prokurorluğu futbolda mərc oyunları ilə bağlı istintaq çərçivəsində yeni əməliyyatlara başlayıb.
APA NTV-yə istinadən xəbər verir ki, Türkiyə Futbol Federasiyasının hakimlərin mərc oyunlarında iştirak etdiyini aşkarlamasından sonra başlayan istintaq çərçivəsində əməliyyatlar genişlənib.
Çoxsaylı klub idarəçisi və futbolçu barəsində saxlanılma qərarı çıxarılıb.
Qeyd edək ki, bir müddət əvvəl İstanbul şəhərinin Baş prokuroru Akın Gürlek Türkiyədə qanunsuz mərc oyunları ilə bağlı klub prezidentləri və hakimlərə qarşı əməliyyatın keçiriləcəyinin anonsunu vermişdi.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
