Hadisə

Ana səhifə

Hadisə

Etimad İsmayılov məhkəmədə ifadə verməkdən imtina edib

23 sentyabr 2008 11:56 (UTC +04:00)

Bakı. Ramil Məmmədli – APA. Azərbaycan Ədalət Partiyasının sədri, Milli Məclisin deputatı İlyas İsmayılovun Rusiyada həbs olunan oğlu Etimad İsmayılovun işi üzrə məhkəmə iclası keçirib. E. İsmayılovun vəkili Cərulla Ramazanov APA-ya bildirib ki, Çelyabinsk şəhər mərkəzi rayon məhkəməsində sentyabrın 22-də keçirilən iclasda müttəhim məhkəmə tərkibindən, dövlət ittihamçısından və ümumiyyətlə işə Çelyabinsk məhkəməsində baxılmasından imtina edib. E. İsmayılov işə Moskvada baxılmasını istəyib və ifadə verməkdən də imtina edib. C. Ramazanov deyib ki, proses sentyabrın 24-də davam etdiriləcək: “Etimad İsmayılov tələbləri yerinə yetirilməyənə qədər ifadə verməyəcəyini söyləyib”.
Qeyd edək ki, E. İsmayılov “Avroasiya” Sənaye-Maliyyə Qrupu Məhdud Məsuliyyətli Cəmiyyətinin sahibidir. Çelyabinsk Vilayətinin qubernatorunun birinci müavini Andrey Kosilovun himayəsində olan şirkətlərdən birinin “Avroasiya”ya 1 milyon ABŞ dolları məbləğində borcu var. Arbitraj Məhkəməsi də həmin şirkətin Etimad İsmayılovun rəhbəri olduğu şirkətə borcunun olduğunu təsdiqləyən sənəd verib.
Xatırladaq ki, E. İsmayılov 2008-ci il martın 25-də gecə Bakıdan Moskvaya qayıdarkən Rusiya Federal Təhlükəsizlik Xidmətinin əməkdaşları tərəfindən Domodedovo hava limanında saxlanılıb. Martın 27-də keçirilən məhkəmə iclasında E. İsmayılova qarşı Rusiya Cinayət Məcəlləsinin 159.4 (dələduzluq) və 174/1 4-cü hissəsi (çirkli pulları yuyulması) maddələri ilə ittiham irəli sürülüb.