Hadisə

Ana səhifə

Hadisə

Azərbaycanın Dəvəçi rayonunda itkin düşən Nailə Məcidovanın meyiti ailəsinə təhvil verilib, digər bacının meyitinin axtarışları isə davam edir -YENİLƏNİB

09 avqust 2007 17:23 (UTC +04:00)

Azərbaycanın Dəvəçi rayonunun Dağ Bilici kəndində itkin düşən 14 yaşlı Nailə Məcidovanın meyiti artıq ailəsinə təhvil verilib. Meyitin bu gün dəfn ediləcəyi gözlənilir. 7 yaşılı Reyhanə Məcidovanın meyitinin tapılması üçün isə axtarış-əməliyyat tədbirləri hələ də davam etdirilir. APA-nın hadisə yerinə ezam olunmuş xüsusi müxbirinin verdiyi məlumata görə, Dağ Bilici kəndinin sakinləri Qələgah kənd sakini, 31 yaşlı Təvəkkül İsmayılovu hadisə ilə bağlı şübhəli bilərək, yaxalayıb polisə təslim ediblər.
Dəvəçi rayon prokuroru Faiq Rzayev APA-ya açıqlamasında bildirib ki, Təvəkkül İsmayılov ifadəsində hər iki qızı qətlə yetirdiyini və kanala atdığını etiraf edib. O, qətli uşaqların atası ilə arasında olan şəxsi ədavətə görə törətdiyini deyib. Ekspertizanın nəticələri 2-3 gündən sonra bəlli olacaq. T. İsmayılov qızlara qarşı cinsi zorakılıq edilmədiyini də söyləyib. Prokuror F. Rzayevin sözlərinə görə, cəsədlərdən ikincisinin axtarışı istiqamətində əməliyyat tədbirləri davam etdirilir. Fakt üzrə Cinayət Məcəlləsinin 120-ci (qəsdən adam öldürmə) maddəsi ilə cinayət işi başlanıb.
T. İsmayılov istintaqa ilkin ifadəsində qətli uşaqların atası Zamir Məcidovla arasında olan şəxsi ədavət səbəbindən törətdiyini desə də, üç il əvvəl yoxa çıxmış Dağ Bilici kənd sakini Diləfruz Daşdiyevanın atası Bədəl Daşdiyev isə APA-ya ədavət versiyasının absurd olduğunu bildirib: “Qızımın itkin düşməsindən sonra Dağ Bilici kəndinin sakinləri Təvəkkül İsmayılovun həbsi tələbi ilə hüquq-mühafizə orqanlarına müraciət ünvanlamışdılar. O vaxt təkcə indi qızları öldürülən Zamir Məcidov bu müraciətə qol çəkmədi və polisə ifadə verməkdən imtina etdi”. B. Daşdiyev T. İsmayılovun rayonda kriminal bir şəxs kimi tanındığını və əvvəllər də bu cür cinayətlər törətdiyini iddia edib: “Təvəkkül hərbi xidmətdən yayınıb, sonra oğurluq törətdiyinə görə cinayət məsuliyyətinə cəlb olunub”. Lakin rayon prokuroru Faiq Rzayev yenə də Diləfruz Daşdəmirovanın T. İsmayılov tərəfindən qətlə yetirilməsinin yalnız sakinlərin ehtimalı olduğunu söyləyib: “Bu barədə bizdə məlumat yoxdur, yalnız həmin şəxsin itkin düşdüyü bəllidir. Onun Təvəkkül İsmayılov tərəfindən öldürülməsi barədə heç bir məlumat yoxdur. Bu istiqamətdə də istintaq hərəkətləri aparılacaq”.
APA-nın əməkdaşlarının israrlarına baxmayaraq, Dəvəçi rayonunun hüquq-mühafizə orqanları zərərçəkən Zamir Məcidov və onun həyat yoldaşı ilə görüşməsinə imkan yaratmayaraq, onların prokurorluqda ifadə verdiklərini deyiblər. Gün ərzində Z. Məcidovun mobil telefonu bağlı olub. Dəvəçi Rayon Mərkəzi Xəstəxanasının həyətində APA əməkdaşının Z. Məcidovun atası Əli Məcidovla söhbətinə isə polislər imkan verməyib və gözüyaşlı babanı “Jiquli” markalı avtomobilə əyləşdirərək oradan uzaqlaşdırıblar.
Dağ Bilici kəndinin sakinləri isə Təvəkkül İsmayılovun cinayəti tək törətmədiyini bildirərək, onun kiçik qardaşı Elnur İsmayılovun həbs edilməsini, eyni zamanda üç il əvvəl yoxa çıxmış Diləfruz Daşdiyevanın itkin düşməsi ilə bağlı araşdırmaların sürətləndirilməsini tələb etdiklərini bildiriblər.
Qeyd edək ki, Baş Prokurorluğun əməliyyat-istintaq qrupu rayona gedib. Meyit üzərində tibbi ekspertiza həmin qrup tərəfindən ekspertiza aparılıb. /APA/