Hadisə

Ana səhifə

Hadisə

Dəvəçi rayonun Dağ Bilici kənd sakinləri Nailə və Reyhanə Məcidovaların itkin düşmələri ilə bağlı araşdırmalar davam etdirilir

10 avqust 2007 13:39 (UTC +04:00)

APA-nın kəndə ezam olunmuş əməkdaşı sakinlərlə söhbətində də onların təşviş içində olduğu müşahidə edib. N. Məcidovanın meyiti avqustun 9-da səhər saatlarında Samur-Abşeron kanalının Siyəzən hissəsində tapılsa da, 7 yaşlı Reyhanənin meyitinin axtarışları davam edir. Hələlik hadisənin törədilməsində şübhəli bilinən yeganə şəxs rayonun Qələgah kənd sakini Təvəkkül İsmayılovdur. Dəvəçi rayon prokuroru Faiq Rzayev APA-ya açıqlamasında T. İsmayılovun ifadəsində cinayəti törətdiyini etiraf etdiyini deyib: “Təvəkkül İsmayılov ifadəsində hər iki qızı qətlə yetirdiyini və kanala atdığını etiraf edib, qətli uşaqların atası ilə arasında olan şəxsi ədavətə görə törətdiyini deyib”.
Amma Dağ Bilici kənd sakinləri T. İsmayılovun ifadəsinin düzgün olmadığını söyləyiblər. İki il əvvəl itkin düşən və məhz T. İsmayılov tərəfindən qətlə yetirildiyi güman olunan 18 yaşlı Diləfruz Daşdıyevanın atası Bədəl Daşdıyev APA-ya bildirib ki, Təvəkküllə hazırda iki qızı itkin düşən Zamir Məcidovun heç bir ədavəti ola bilməz: “Əksinə, üç il əvvəl qızım itkin düşəndə hamı ifadə verib, Təvəkkülün həbsini istədi. Təkcə Zamir bunu etmədi, onun üzünə durmayacağını söylədi. Onların indi hansı ədavəti ola bilər ki?..”
B. Daşdıyev qızı Diləfruz Daşdıyevanın itkin düşməsindən də danışıb: “İki il əvvəl Təvəkkül İsmayılov bizə xəbər göndərdi ki, Diləfruzla evlənmək istəyir. Biz də inanıb, qızımızı ona verdik. Bir müddətdən sonra qızımızın qaçması barədə bizə xəbər yolladı. Mən qızıma bələd olan adam kimi, bunun yalan olduğunu dedim, Təvəkkülə qızımı öldürdüyünü söylədim. Amma o, boynuna almadı. Baş verənlə bağlı rayonun və respublikanın hüquq-mühafizə orqanlarına dəfələrlə müraciətlər etdim, amma nəticəsiz qaldı. Təvəkkülü əvvəl həbs etdilər, lakin rayon polis şöbəsinin rəis müavini Musa Hüseynovun köməyi ilə o həbsdən canını qurtardı. Üstündən bir az keçəndən sonra qonşu Ləcə kəndinin sakini Rahim adlı bir nəfər dağlardan qızımın paltarlarını tapdı. Bundan sonra biz Diləfruzun öldüyünə inandıq. Rahimin 32-33 yaşı vardı, 3 uşaq atası idi. Paltarları tapandan az sonra o da itkin düşdü, öldü-qaldısından hələ də xəbər yoxdur”.
B. Daşdıyev deyib ki, sonuncu iki azyaşlı qızın itməsindən sonra camaat Təvəkkül İsmayılovla bağlı yenidən polisə müraciət edib: “Polisin onu tutmadığını görəndə isə özümüz onu Dağ Bilici kəndinin yaxınlığında tutub, polis bölməsinə apardıq”. Kəndin digər sakinləri də B. Daşdıyevin dediklərini təsdiqləyiblər.
APA-nın əməkdaşları hadisə yerində olduğu müddətdə Nailə və Reyhanənin valideynləri ilə görüşməyə cəhd etsələr də, onların prokurorluqda ifadə verdikləri bildirilib.
Dağ Bilici kəndinin sakinlərinin iddialarına görə, T. İsmayılov cinayəti tək törətməyib, onun kiçik qardaşı Elnur İsmayılovun da həbs edilməsini, eyni zamanda üç il əvvəl yoxa çıxmış Diləfruz Daşdiyevanın itkin düşməsi ilə bağlı araşdırmaların yenilənməsinə ehtiyac var. Yeni təyin olunan rayon prokuroru F. Rzayev isə Diləfruz Daşdıyevanın T. İsmayılov tərəfindən qətlə yetirilməsinin yalnız sakinlərin ehtimalı olduğunu söyləyib: “Bu barədə bizdə məlumat yoxdur, yalnız həmin şəxsin itkin düşdüyü bəllidir. Onun Təvəkkül İsmayılov tərəfindən öldürülməsi barədə heç bir məlumat yoxdur. Bu istiqamətdə də istintaq hərəkətləri aparılacaq”.
Kənd sakinləri həm də T. İsmayılovun rayon polis rəisinin müavini Musa Hüseynovla yaxşı münasibətləri olduğunu iddia ediblər. Belə ki, kənd sakinlərinin söylədiklərinə görə, Təvəkkül və qardaşı Elnur İsmayılov rəis müavininin mal-qarasına naxırçılıq ediblər.
Dəvəçi rayon polis şöbəsinin rəis müavini Musa Hüseynov isə APA-ya bildirib ki, onun T. İsmayılov və onun ailəsi ilə əlaqələri haqda kənd sakinlərinin dedikləri qərəzdən başqa bir şey deyil: “Bu məni istəməyənlərin sözüdür”. M. Hüseynov digər məsələlərlə bağlı açıqlama verməkdən imtina edib və hər şeyin araşdırma sonunda ortaya çıxacağını deyib.
Qeyd edək ki, N. Məcidovanın meyiti dünən axşam saatlarında ailəsinə təhvil verilib, bu gün isə dəfn edilib. R. Məcidovanın axtarışı istiqamətində əməliyyat-istintaq tədbirləri isə davam etdirilir. /APA/