Hadisə

Ana səhifə

Hadisə

Yol qəzalarında 6 nəfər ölüb

16 oktyabr 2007 12:34 (UTC +04:00)

Nərimanov rayonu ərazisində ölümlə nəticələnən yol-nəqliyyat hadisəsi baş verib. Daxili İşlər Nazirliyinin mətbuat xidmətindən APA-ya verilən məlumata görə, Z. Bünyadov prospektində Bakı şəhər sakini Xanniyaz Hacıyevin idarə etdiyi “Moskviç” və Ağstafa rayon sakini Pərvin Tatarovun idarə etdiyi “KamAZ” markalı avtomaşınlar toqquşub. Nəticədə xəsarətlə xəstəxanaya yerləşdirilmiş X. Hacıyev orada vəfat edib. Faktla bağlı Nərimanov RPİ-də araşdırma aparılır.
İmişli rayonu ərazisində Aranlı kənd sakini Hikmət Hüseynov idarə etdiyi “VAZ-2107” markalı avtomaşınla Məzrəli kənd sakini İlkanə Məmmədovanı vurub. Nəticədə xəsarətlə xəstəxanaya yerləşdirilmiş İ. Məmmədova orada ölüb. Faktla bağlı İmişli RPŞ-də araşdırma aparılır.
Füzuli rayonu ərazisində Cəbrayıl rayon sakini Vidadi Haqverdiyev idarə etdiyi “Mercedes” markalı avtomaşını yolun kənarındakı ağaca vuraraq aşırıb. Nəticədə xəsarət almış V. Haqverdiyev və maşında olan qardaşı Vahid xəstəxanaya yerləşdirilib. Vahid orada dünyasını dəyişib. Faktla bağlı Füzuli RPŞ-də araşdırma aparılır.
Göyçay rayonunun Mirzəhüseynli kəndində Ağdaş rayon sakini Mustafa Kərimovun idarə etdiyi “Daewoo” və Sumqayıt şəhər sakini Vasif Mehdiyevin idarə etdiyi “Mercedes” markalı avtomaşınlar toqquşub. Nəticədə M. Kərimov və sərnişinlərindən həyat yoldaşı Sevil hadisə yerində keçinib, xəsarət almış qızı Samirə isə xəstəxanaya yerləşdirilib. Faktla bağlı Göyçay RPŞ-də araşdırma aparılır.
Ağcabədi rayonunun Arasbar kəndində kənd sakini Qırımxan Piriyev idarə etdiyi “VAZ-2106” markalı avtomaşını aşırıb. Nəticədə xəsarət almış Q. Piriyev və sərnişini, qardaşı Ələkbər xəstəxanaya yerləşdirilib. Q. Piriyev orada vəfat edib. Faktla bağlı Ağcabədi RPŞ-də araşdırma aparılır. /APA/