Hadisə

Ana səhifə

Hadisə

Ermənilər bu gün Tovuzda “Alı dədə” türbəsi kimi tanınan tarixi abidəni və qəbiristanlığı yandırıblar

16 oktyabr 2007 19:57 (UTC +04:00)

Yanğınlar baş verən ərazi minalandığından yanğın güclü partlayışlarla müşayiət olunub. Hadisə baş verən zaman güclü tufan qopması və yağış yağması yanğının Ağdam kəndinin yaşayış olan ərazilərinə keçməsinin qarşısını alıb.
Qeyd edək ki, yerli sakinlər münaqişə başlayandan qəbiristanlıq və ziyarətgaha gedə bilmirlər. Ziyarətə gedən kənd sakinləri dəfələrlə ermənilərin atəşi altında qalıblar.
Yanğınlarla yanaşı oktyabrın 15 və 16-da Ermənistan Silahlı Qüvvələri müxtəlif istiqamətlərdən cəbhəyanı kəndləri atəşə tutublar. Onlar eyni zamanda sərhəddə olan 5 iribuynuzlu mal-qaranı da oğurlaya biliblər.
Yanğın faktlarını Tovuzda yerləşən regional “Simurq” Televiziyası lentə ala bilib.
Hadisəyə münasibət bildirən millət vəkili Qənirə Paşayeva beynəlxalq təşkilatların və ATƏT-in Minsk qrupuna üzv ölkələrin Azərbaycanda akkreditə olunan səfirlərinin bu məsələyə sərt reaksiyalarını gözlədiklərini deyib. Azərbaycanın nəzarətində olan ərazidə qəbiristanlığın və əhalinin müqəddəs ziyarətgahı sayılan, tarixi-mədəni abidənin yandırılmasını vandalizm aktı adlandıran millət vəkili bunun bütün beynəlxalq konvensiyalara və hüquq normalarına zidd olduğunu söyləyib. Onun sözlərinə görə, insanların heysiyyatına toxunmaq üçün atılan belə addımlarla Azərbaycanın digər cəbhəyanı əraziləri kimi Tovuz rayonu da ilk dəfə deyil ki qarşılaşır: “Neçə illərdir ki, Azərbaycan ərazisində yerləşən bu məzarlığı ziyarət etmək istəyənlər ermənilərin snayper atəşi ilə qarşılaşır. Orda kənd sakinlərinin doğmalarının məzarlarını və türbəni ziyarət etmələri mümkünsüz olub. Cəbhəyanı kəndlərin əhalisi əkin-biçinlə məşğul ola bilmir. Onlar bütün həyatlarını ermənilərin snayper atəşlərinin altında keçirirlər”.
Millət vəkili Azərbaycanın işğal altında olan ərazilərinin yandırılması ilə bağlı dəfələrlə ATƏT, Avropa Şurası kimi beynəlxalq təşkilatlar qarşısında məsələ qaldırıldığını, hətta yazılı sənədlər yayıldığını da xatırladıb: “Həmin vaxt problemə lazımı sərt reaksiyanın verilməməsi bu gün ermənilərin bu vandallıq aktlarının sayının artmasına, artıq nəinki işğal altında olan torpaqlarda, həmçinin sərhəddə yerləşən ərazilərdə, özü də qəbiristanlığı və tarixi abidəni yandırmaları ilə nəticələnir. İndi biz ATƏT-in monitorinq qrupunun hadisə ilə bağlı sərt reaksiyasını gözləyirik, hesab edirik ki, beynəlxalq təşkilatlar bu hadisəyə çox sərt reaksiya verməlidirlər. Çünki bu cür hallar münaqişənin həlli ilə bağlı danışıqlar prosesinə birbaşa zərbədir. Bu yanğın lentlərinin beynəlxalq təşkilatlara təqdim olunmasını da təmin edəcəyik”. /APA/