Hadisə

Ana səhifə

Hadisə

Elçin Behbudov: “Qobustandakı məhbuslar həbsxananın keçmiş rəisi Əlizadə Hüseynovun şəxsən onlara psixotrop maddə payladığını dedilər” - YENİLƏNİB

Elçin Behbudov: “Qobustandakı məhbuslar həbsxananın keçmiş rəisi Əlizadə Hüseynovun şəxsən onlara psixotrop maddə payladığını dedilər” - <font color=#FF0000>YENİLƏNİB</font>

27 oktyabr 2007 13:30 (UTC +04:00)

Bu gün İşgəncələrə Qarşı Azərbaycan Komitəsinin sədri Elçin Behbudov Qobustan qapalı həbsxanasında olub. E. Behbudov APA-ya bildirib ki, həbsxanada ömürlük azadlıqdan məhrum edilmiş Elçin Əmiraslanovun qardaşının müraciəti əsasında onunla görüşüb. Komitə sədri müraciətdə E. Əmiraslanovun döyülməsi və özünü doğraması ilə bağlı faktın təsdiqini tapmadığını bildirib: “Elçin Əmiraslanovla görüşdüm. Onunla söhbət zamanı məlumatların yalan olduğunu bildirdi. Elçin yalnız başında ağrıların yarandığını deyib”. E. Behbudov həbsxanada həmçinin digər məhkumlar Bəxtiyar Cəfərov, aclıq aksiyası keçirərək ağzını tikən Sideyif Babayev, qollarını doğrayan Azad Babayevlə görüşdüyünü qeyd edib: “Həbsxanada ömürlük azadlıqdan məhrum edilmiş məhkumlar deyil, məhkəmə tərəfindən müəyyən müddətə azadlıqdan məhrum edilmiş məhbuslar aclıq ediblər. Bu məhkumların problemləri var. Problemləri həbsxana tərəfindən lazımi dərman verilməməsi və həkimlə bağlıdır. Həbsxananın yeni təyin olunmuş rəisi Kazım Abdullayev isə məhbusların istədikləri dərmanın psixotrop maddələr olduğunu vurğulayıb. Kazım Abdullayev mənə bildirib ki, təyin olunduqdan sonra bu maddələrin istifadəsinin qarşısını aldığı üçün məhbuslar etiraz edirlər. Həbsxananın həkimi də məhbusların psixotrop dərmanlar tələb etdiklərini təsdiqləyib. Məhbuslar həbsxananın keçmiş rəisi Əlizadə Hüseynovun şəxsən onlara psixotrop maddə payladığını və bu əməllərinə görə işdən azad olunduğunu bildiriblər”. Komitə sədri həbsxanaya ordunun yeridilməsi ilə bağlı mətbuatda yayılan məlumatları da yalan olduğunu vurğulayıb.
“Qobustandakı məhbuslara mənim psixotrop maddə paylamağım barədə deyilənlər ağ yalandır. Belə bir şey mümkün deyil. Bu necə ola bilər? Mən, əksinə, belə halın qarşısını almışam”. Bunu APA-ya açıqlamasında Qobustan qapalı həbsxanasının sabiq rəis əvəzi Əlizadə Hüseynov deyib. Ə. Hüseynov belə fikirlərin həqiqətə uyğun olmadığını bildirib: “Əgər hər hansı dustaq bu barədə demiş olsa, onda bu günə kimi işlədiyim işin hamısını yerə vuraram. İnanmıram ki, həbsxananın işçiləri və məhbuslar belə söz desin. Bu həqiqətə uyğun olmayan məlumatlardır. Gedənin arxasınca danışmaq onsuz da adət halını alıb, bu tamamilə yalandır. Rəis də belə iş görər? Həbsxanada rəis deyildim, rəis təyin olunanadək həmin vəzifəni 8 ay icra etmişəm. Rəis təyin olunduqdan sonra isə qayıtdım nazirliyin tədris müəssisəsində köhnə işimə. Ancaq bu o demək deyil ki, mən işimdən sui-istifadə etmişəm”. /APA/