Hadisə

Ana səhifə

Hadisə

Yaxın iki həftə ərzində “Azalhelikopters” şirkətinə məxsus vertolyotun qəzaya uğrama səbəbləri açıqlanacaq

29 oktyabr 2007 13:25 (UTC +04:00)

Bu barədə APA-ya “Azərbaycan Hava Yolları” Dövlət Konserninin baş direktor müavini Rauf Cəfərzadə məlumat verib.
R.Cəfərzadənin sözlərinə görə, hazırda vertolyotun “qara qutu”sundakı lent yazılarının oxunması prosesi gedir: “Hazırda lent yazıları Mokvada dinlənilir. “Qara qutu”da səslər tükdən nazik məftil lentə yazılır. Lent qarışıq düşdüyündən onları oxumaq çox çətinləşib”.
Qeyd edək ki, oktyabrın 12-də qəzaya uğramış Mi-8 vertolyotu ARDNŞ-in Kompleks Qazma İşləri Trestinin “Qərbi Abşeron” dəniz neft-qaz yatağındakı “Xəzər-4” özüqalxan üzən qazma qurğusunda çalışan “Bayıl limanı” Kəşfiyyat Dəniz Qazma İdarəsinin əməkdaşı Qəhrəman Əsədovun səhhətində yaranmış problemlə əlaqədar xəstəni və onu müşayiət edən iş yoldaşı Zahid Şaşkayevi götürərək, havaya qalxdıqdan az sonra dənizə düşüb. Hadisə zamanı vertolyotda 4 nəfər ekipaj üzvü və ARDNŞ-in adları çəkilən 2 əməkdaşı olub. Bu günədək Xəzər Dəniz Neft Donanmasının 20-dək dalğıcı və kran gəmiləri vasitəsi ilə dənizin 12 metr dərinliyindən 5 cəsəd və vertolyotun əsas hissələri çıxarılıb.
Qeyd edək ki, sudan çıxarılmış cəsədlər qəzaya uğramış vertolyotun kapitan Vladimir Nekrasov, 2-ci pilot Əhməd Əliyev, təlimatçı-kapitanı Viktor Qrinenko, onun köməkçisi, vertolyotun mexaniki Cahid İbrahimov və “Bayıl Limanı” Dəniz-Kəşfiyyat Qazma İdarəsinin 6-cı dərəcəli elektriki, 1956-cı il təvəllüdlü Şaşkayev Zahid Cavad oğlunundur. /APA/