Maliyyə

Ana səhifə

Maliyyə

Azərbaycanın nağd dollar bazarında əhalinin apardığı alış əməliyyatları satışdan üç dəfə çoxdur

06 yanvar 2009 12:49 (UTC +04:00)

Bakı. Vahab Rzayev – APA-Economics. Azərbaycanda nağd ABŞ dolları ilə aparılan əməliyyatların həcmi 2008-ci ilin yanvar-noyabr ayları ərzində 5 652 698,1 min dollar təşkil edib. Azərbaycan Milli Bankından «APA-Economics»ə verilən məlumata görə, nağd dollarla aparılan ticarətin həcmi 2007-ci ilin eyni dövrünün analoji göstəricisindən 41,3% çoxdur. Eyni zamanda, bu, 2007-ci ilin ümumi göstəricisini 25,3% üstələyir.
Nağd dollar üzrə əməliyyatların həcminin strukturunda 1 360 991,0 min dollar alış, 4 291 707,1 min dollar isə satış əməliyyatlarının payına düşüb və satışın həcmi alışdan 3,2 dəfə çoxdur.
Qeyd edək ki, alış və satış əməliyyatları burada bankların mövqeyindən qeyd olunur. Belə ki, banklar tərəfindən aparılan satış əməliyyatlarının alışı üstələməsi əhalinin nağd dolların alışını aktiv apardığını göstərir. Beləliklə, Azərbaycanda əhali daha çox manatı dollara konvertasiya edir, nəinki əksinə. Bu, bir neçə amillə bağlıdır. İlk növbədə bu proses əhalinin gəlirlərinin xərclərini üstələdiyini göstərir, çünki əks halda ölkədə hesablaşma valyutası kimi istifadə edilməyən dolları əhali bu həcmdə almazdı. Azərbaycanda ənənəvi olaraq məhz ABŞ dollarından yığım valyutası kimi istifadə olunur - əhali öz gəlir qalıqlarını dolların alınmasına yönəldir.
Digər tərəfdən pərakəndə idxal, o cümlədən satış və ya istehlak məqsədi ilə malların idxalı hələ də əsasən dollar vasitəsi ilə aparılır. Məhz xaricdən müxtəlif məqsədlərlə mal alınması üçün manat dollara konvertasiya olunur. Bundan başqa, xaricə işgüzar, turizm və sair məqsədlərlə yollanan şəxslər cari xərcləri üçün Azərbaycanda əsasən məhz dollar kütləsi alırlar. Nəticədə, Azərbaycanda nağd dollara olan cari tələbat hələ də təklifi dəfələrlə üstələyir.