Maliyyə

Ana səhifə

Maliyyə

Avropa Yenidənqurma və İnkişaf Bankı Azərbaycanda prosessinq mərkəzində pay alır

09 yanvar 2009 09:07 (UTC +04:00)

Bakı. Nicat Mustafayev – APA-Economics. Avropa Yenidənqurma və İnkişaf Bankı (AYİB) Azərbaycanın bank kredit kartı xidmətləri təchizatçısı «MilliKart» MMC-də 10% iştirak payı alır.
AYİB-in Bakı ofisindən «APA-Economics»ə verilən məlumata görə, payın alınması layihəsi «MilliKart» MMC-nin təşkilatı strukturunun möhkəmləndirilməsi planının həyata keçilməsinə 250 min avro dəyərində texniki yardımla müşayiət olunacaq. Ümumilikdə, bu layihənin məqsədi Azərbaycanda ilkin inkişaf mərhələsində olan kart biznesi sahəsində fəaliyyət göstərən qurumun kapital bazasının yaxşılaşdırılması və səmərəliyinin artırılmasına kömək etməkdir. AYİB şirkətin İdarə Heyətində bir direktorla təmsil olunacaq.
Payın alınması layihəsi AYİB-in Səhmdarlarının Xüsusi Fondundan maliyyələşdiriləcək. Ötən il keçirilən səhmdarların illik toplantısında 115 mln. avro səviyyəsində təsdiqlənən Xüsusi Fond donor ölkələrin ildə ənənəvi olaraq verdiyi 80 mln. avro yardımını tamamlayaraq Qafqaz, Mərkəzi Asiya və Qərbi Balkanda həyata keçirilən layihələrin maliyyələşdirilməsinə sərf olunur.
Qeyd edək ki, hazırda «MilliKart» MMC-nın səhmdarlı rolunda 18 kommersiya bankı çıxış edir. Bunlardan «Bank Standard», «Texnikabank», «Azerdemiryolbank», «UniBank», «AtaBank» və «Bank Respublika»nın ümumi payı 40%-dir, digər səhmdarlar isə «Debut Bank», «Əmrahbank», «Xalq Bank», «Kredobank», «Bank of Baku», «Rabitabank», «Parabank», «Turanbank», «Zaminbank», «Azər-Türk Bank», «Azərbaycan Sənaye Bankı» və «AccessBank»dır.