Maliyyə

Ana səhifə

Maliyyə

Azərbaycanda «Doruk Maliyyə Lizinq» şirkətinin səhm emissiyası baş tutmayıb

13 yanvar 2009 13:19 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsi (QKDK) sədrinin əmri ilə «Doruk Maliyyə Lizinq» ASC-nin sənədsiz adlı səhmlərinin emissiyası baş tutmamış elan olunub.
QKDK-nin informasiya və ictimaiyyətlə əlaqələr şöbəsindən «APA-Economics»ə verilən məlumata görə, səhmlərin emissiyası haqqında səhmdarların ümumi yığıncağının qərarı ilə səhmlərin yerləşdirilməsinin müddəti 2008-ci ilin dekabrın 30-dək müəyyən edilsə də, bu müddət ərzində səhmlər yerləşdirilməyib.
QKDK-nin «Səhmdar cəmiyyətinin nizamnamə kapitalının artırılması zamanı səhmlərin emissiyasının Qaydaları»na əsasən, səhm emissiyasının baş tutmuş hesab edilməsi üçün əsas olan yerləşdirilmiş hissəsi yerləşdirilən səhmlərin miqdarının 50%-ni təşkil etməlidir.
Qeyd edək ki, «Doruk Maliyyə Lizinq» ASC-nin sənədsiz adlı səhmləri 2008-ci ilin oktyabrın 14-də dövlət qeydiyyatına alınıb. Səhmlərin hər birinin nominal dəyəri 10 manat, sayı 39,6 min ədəd, emissiyanın ümumi həcmi isə 396 min manat təşkil edib. Emissiya uğurla yerləşdirilsəydi, ASC-nin nizamnamə kapitalı 100 dəfə artaraq 400 min manat çatacaqdır.
Xatırladaq ki, Azərbaycanın «Doruk Maliyyə Lizinq» ASC 2007-ci ildən fəaliyyət göstərir. Hazırda ASC-nin nizamnamə kapitalı 4 min manat təşkil edir.