Maliyyə

Ana səhifə

Maliyyə

«Texnika Leasing» ötən il lizinq portfelini 67% genişləndirib

14 yanvar 2009 08:41 (UTC +04:00)

Bakı. Elnur Hüseynquluyev – APA-Economics. Azərbaycanın «Texnika Leasing» şirkətinin lizinq portfeli 2009-cu ilin yanvar ayının 1-nə 6,556 mln. manat təşkil edib ki, bu da ötən ilin yanvarın 1-nə olan analoji göstərici ilə müqayisədə 67,4% çoxdur.
Şirkətdən «APA-Economics»ə verilən məlumata görə, hesabat ilində şirkətin məcmu kapitalı 2 dəfə artaraq 4,50 mln. manat, nizamnamə kapitalı isə sabit qalaraq 200 min manat olub. Bu müddət ərzində şirkətin lizinqə verdiyi avadanlıqların dəyəri 33,4% artaraq 2,915 mln. manata, bağlanan müqavilələrin sayı isə 2,5 dəfə artaraq 48-ə çatıb.
Lizinq portfelin strukturunda 70% tikinti sektoruna aid olan xüsusi təyinatlı avadanlıqlar, 25% minik avtomobilləri, 5% isə digər sahələrin payına düşüb.
Qeyd edək ki, 2008-ci il ərzində şirkətin ölkə iqtisadiyyatına yatırdığı investisiyaların həcmi 64,7% artaraq 2,470 mln. manata çatıb.
Xatırladaq ki, şirkət tərəfindən lizinq avadanlıqları illik 18-19%, 6-24 ay müddətinə verilir. Lizinq avadanlıqlarının minimum dəyəri 20 min manat, ilkin ödəniş isə 20-25% olmalıdır.
«Texnika Leasing» şirkəti 2006-cı ildən fəaliyyət göstərir. Şirkətin fəaliyyət dairəsi yalnız Abşeron iqtisadi rayonunu əhatə edir.