Maliyyə

Ana səhifə

Maliyyə

Azərbaycanın gömrük orqanları ötən il 4 208 hüquqpozma faktı aşkar edib

14 yanvar 2009 11:51 (UTC +04:00)

Bakı. Rəşad Süleymanov – APA-Economics. Azərbaycan Dövlət Gömrük Komitəsi (DGK) tərəfindən 2008-ci ildə həyata keçirilən tədbirlər nəticəsində 4 208 hüquqpozma faktı aşkar edilib. Aşkar edilmiş faktlardan 175-i cinayət xarakterli olub və bu faktlarla əlaqədar təqsirli bilinən 172 nəfər barəsində müvafiq tədbirlər görülüb. Bu barədə «APA-Economics»ə DGK-nın mətbuat xidmətindən məlumat verilib.
Hesabat dövründə gömrük orqanları tərəfindən aşkar edilən cinayətlərin böyük bir hissəsi narkotik vasitələrin qanunsuz dövriyyəsi ilə əlaqədar olub. Azərbaycanda 2008-ci ildə narkoşərait əvvəlki illərə nisbətən daha mürəkkəbliyi ilə səciyyələnib.
Ötən il narkotik vasitələrin qanunsuz dövriyyəsi ilə əlaqədar 64 fakt aşkar olunub və bu faktlar üzrə 356 kq 338 qram narkotik, o cümlədən 68 kq 255 qram heroin, 62 kq 732 qram tiryək, 221 kq 406 qram həşiş, 3 kq 945 qram marixuana, 4204 ədəd psixotrop maddə (ampul, kapsul və həb şəklində) və 242 qram metamfetamin maddəsi tutulub. Bundan əlavə, gömrük orqanları əməkdaşlarının təşəbbüsü ilə 22,5 ton yabanı halda bitən çətənə kolu aşkar edilərək yandırma üsulu ilə məhv edilib. Qanunsuz dövriyyədən götürülən narkotiklərin miqdarı 2007-ci il ilə müqayisədə 2,87 dəfə, o cümlədən heroinin miqdarı 5,9 dəfə, tiryəkin miqdarı 1,67 dəfə, həşişin və psixotrop maddələrin miqdarı 3 dəfə çox olub.
Narkoqaçaqmalçılıqda təqsirli və ya şübhəli bilinərək saxlanılmış 84 nəfərdən 64-ü Azərbaycan, 16-sı İran, 1-i Ukrayna, 1-i Rusiya, 1-i Gürcüstan, 1-i Türkiyə vətəndaşı, 10-u qadın, 74 nəfəri isə kişi olub.
Valyuta qanunvericiliyinin pozulmasına qarşı gömrük orqanları tərəfindən görülən tədbirlər nəticəsində 2008-ci ildə hüquqpozma predmeti kimi külçə və zinət əşyaları şəklində 1 kq 967 qram qızıl, 29 kq 58 qram gümüş, 89 570 ABŞ dolları, 2 mln. 455 min rus rublu tutulub. Ötən il ərzində gömrük qaydaları əleyhinə inzibati xəta faktları üzrə başlanılmış 4 033 iş üzrə 1 468 hüquqi şəxs (o cümlədən, 919 xarici hüquqi şəxs) və 2 567 fiziki şəxs (o cümlədən, 782 xarici) inzibati məsuliyyətə cəlb edilib. Bu faktlar üzrə göstərilən şəxslərə qarşı 920 225 manatdan çox cərimə sanksiyası tətbiq edilib, habelə 443 111 manat dəyərində mallar müsadirə olunub. Miqdarına görə aşkar edilmiş inzibati xəta faktlarının çoxu - 415-i malların və nəqliyyat vasitələrinin bəyan edilməməsi və ya düzgün bəyan edilməməsi ilə əlaqədar xətalardır. Bundan əlavə inzibati xəta faktlarının 112-si gizli keçirmə ilə, 278-i müvəqqəti idxalla, 9-u aksiz markasız idxalla, qalanları isə digər pozuntularla əlaqədardır.
Gömrük orqanları tərəfindən cinayət və inzibati xəta faktları üzrə 114 kq qara kürü, 3 min litr neft məhsulu, 4 ədəd odlu silah və onlara aid 62 ədəd patron, 5 880 ədəd soyuq silah sayılan bıçaq, 3 551 ədəd dini kitablar, 56 kq Ermənistan istehsalı olan və orqanizm üçün zərərli sayılan qəhvə, 6 ədəd tarixi əhəmiyyət kəsb edən əşya, 5 984 kq balıq məhsulları saxlanılaraq barələrində müvafiq tədbir görülüb.
Aksiz markalarının tətbiqi qaydalarının pozulması hallarının qarşısını almaq üçün görülmüş tədbirlər nəticəsində isə aksiz markasız və ya digər qanunsuz yollarla keçirilən 1,842 mln. ədəddən çox xaricdə istehsal olunan siqaret və 3 224 ədəd spirtli içki saxlanılıb.