Maliyyə

Ana səhifə

Maliyyə

Azərbaycan prezidentinin sədrliyi ilə ölkə hökumətinin 2008-ci ilin yekunlarına dair iclası keçirilib

16 yanvar 2009 15:26 (UTC +04:00)

«APA-Economics»in məlumatına görə, dövlət başçısı 2008-ci ilin dünya tarixinə maliyyə böhranı kimi daxil olmasına baxmayaraq Azərbaycan üçün uğurlu olduğunu vurğulayıb. Ötən il əhalinin pul gəlirlərində 36% artım qeydə alınıb, minimum əmək haqqı və minimum pensiya 50% artırılıb. Prezident bildirib ki, hazırda Azərbaycanda orta aylıq əmək haqqı 335 ABŞ dolları, orta aylıq pensiya isə 120 dollardır.
Prezident son 5 ildə ölkədə 766 min yeni iş yerinin açıldığını, onlardan 548 mininin daimi olduğunu və təkcə 2008-ci ildə 120 mindən çox yeni iş yerinin yaradıldığını deyib.
Dövlət başçısı bildirib ki, dünyada müşahidə olunan maliyyə böhranına baxmayaraq, 2009-cu ilin dövlət büdcəsinin xərcləri 15,4 mlrd. dollar, icmal büdcə isə 18,4 mlrd. dollar həcmində təsdiq edilib.
«Ölkəmizin enerji sahəsində əldə etdiyi uğurlar mövqelərimizi daha da möhkəmləndirib. İndi Azərbaycanın neft və qazını dünya bazarına çıxaran 7 kəmər var və onların hamısı işləyir», - deyə prezident vurğulayıb.
Bu il üçün ölkənin müdafiəsinə yönəldilən vəsaitlərin həcminin artdığını deyən ölkə prezidenti cari ildə Azərbaycanın hərbi xərclərinin 2,3 mlrd. dollar təşkil edəcəyini bəyan edib.
Ötən il Dağlıq Qarabağ münaqişəsinin həlli istiqamətində Azərbaycanın mövqelərinin daha da gücləndiyini qeyd edən İ.Əliyev BMT Baş Məclisində Azərbaycanın mövqeyini dəstəkləyən qətnamənin qəbulunu siyasi və diplomatik uğur, Moskva Bəyannaməsini bunun davamı kimi qiymətləndirib.
Sonra maliyyə naziri Samir Şərifov, iqtisadi inkişaf naziri Şahin Mustafayev, Milli Bankın İdarə heyətinin sədri Elman Rüstəmov 2008-ci ildə həyata keçirilən tədbirlər və görülən işlərin nəticələri barədə çıxış ediblər.
Yekun nitqində dövlət başçısı dünya maliyyə böhranının nəticələrinin Azərbaycanda minimuma endirilməsinin 2009-cu ildə əsas hədəflərdən biri olduğunu bəyan edib. Azərbaycanın qaz ixrac edən ölkəyə çevrildiyini xatırladan İ.Əliyev bildirib ki, ölkənin ümumi qaz ehtiyatı 2 trln. kubmetr təşkil edir. Ölkə daxilində qazlaşdırmanın 85%-ə çatdığını deyən dövlət başçısı 2009-cu ildə Azərbaycan qazının nəqli ilə bağlı tranzit sazisinin imzalanacağı təqdirdə, Yunanıstan və Bolqarıstana qaz ixrac olunacağını vurğulayıb.
Prezident İ.Əliyev bank sektorunun inkişafı ilə bağlı ciddi tədbirlərin görülməsi, sosial proqramların icrası ilə bağlı hökumətə müvafiq tapşırıqlar verib.