Maliyyə

Ana səhifə

Maliyyə

Ötən il Azərbaycanın dövlət büdcəsinin gəlirləri 10,763 mlrd. manat təşkil edib

17 yanvar 2009 10:03 (UTC +04:00)

Bakı. Vahab Rzayev - APA-Economics. Azərbaycanın 2008-ci ildə dövlət büdcəsinin mədaxil hissəsi 10 763 mln. manat təşkil edib ki, bu da əvvəlki illə müqayisədə 79,2%, proqnozlardan isə 2,7% çoxdur. “APA-Economics”in məlumatına görə, bu barədə Azərbaycan prezidentinin sədrliyi ilə Nazirlər Kabinetinin 2008-ci ildə sosial-iqtisadi inkişafın yekunlarına həsr olunmuş iclasında maliyyə naziri Samir Şərifov bildirib.
S. Şərifovun sözlərinə görə, o cümlədən büdcəyə Vergilər Nazirliyi tərəfindən 5 694 mln. manat və ya əvvəlki ildən 26,2%, proqnozlardan isə 5,8% artıq vəsait köçürülüb. Dövlət Gömrük Komitəsi tərəfindən proqnoza 100% əməl edilməklə, dövlət büdcəsinə 1 110 mln. manat vəsait daxil olunub ki, bu da 2007-ci illə müqayisədə 43,8% çoxdur. Dövlət Neft Fondundan dövlət büdcəsinə daxil olmalar isə 3,8 mlrd. manat təşkil edib.

Ötən il dövlət büdcəsinin xərcləri 10 680 mln. manata bərabər olub ki, bu da proqnozların 96,6% təşkil edir. Eyni zamanda büdcə xərcləri 2007-ci ildəkindən 75,5% çox olub: “Beləliklə, ötən ilin dövlət büdcəsi kəsirli olmayıb və profisistin həcmi 83 mln. manat təşkil edib”.

Nazir bildirib ki, ötən il sosialyönümlü tədbirlər üzrə xərclərin maliyyələşdirilməsinə 2 312 mln. manat vəsait sərf edilib ki, bu da 2007-ci illə müqayisədə 38,4% çoxdur. O cümlədən, dövlət büdcəsinin cari xərclərində sosialyönümlü tədbirlər üzrə xərclərin tərkib hissəsi olan sosial müdafiə və sosial təminat xərcləri il ərzində 42,2%, səhiyyə xərcləri 34,6%, təhsil xərcləri 35,5%, mədəniyyət, incəsənət, informasiya, bədən tərbiyəsi xərcləri 47,1% artıb.

S. Şərifovun sözlərinə görə, ümumilikdə dövlət büdcəsi xərclərinin strukturu üzrə 2008-ci ildə 2007-ci ilə nisbətən sənaye və tikinti xərcləri 2,2 dəfə, mənzil və kommunal təsərrüfatı xərcləri 69,5%, müdafiə xərcləri 62,8%, ümumi dövlət xidməti xərcləri 41%, məhkəmə hakimiyyəti, hüquq mühafizə və prokurorluq orqanlarının saxlanılması xərcləri 23,8%, aqrar və ətraf mühitin mühafizəsi xərcləri 13,9% artıb. Eyni zamanda 2008-ci ildə vacib hesab olunan bir sıra tədbirlərin maliyyələşdirilməsinə Azərbaycan Respublikası Prezidentinin Ehtiyat Fondundan 154 mln. manat, dövlət büdcəsində nəzərdə tutulmayan tədbirlərin maliyyələşdirilməsinə isə dövlət büdcəsinin ehtiyat fondundan 115,7 mln. manat vəsait ayrılıb.

Ötən il dövlət investisiya qoyuluşu xərclərinə dövlət büdcəsindən 4 276 mln. manat (2007-ci illə müqayisədə 2,2 dəfə çox), Dövlət Neft Fondundan 453 mln. manat, dövlət zəmanəti ilə alınmış xarici kreditlər hesabına 430 mln. manat vəsait ayrılıb. O cümlədən,
təhsil obyektlərinin tikintisi və təmirinə 214 mln. manat, səhiyyə obyektlərinin tikintisi və təmirinə 204 mln. manat vəsait istifadə olunub. Mədəniyyət və turizm obyektlərinin tikintisi və əsaslı təmirinə, o cümlədən mədəni-tarixi irsimizin qorunub saxlanılmasına, tarixi, dini abidələrin bərpası və yenidən qurulmasına, milli ifaçılıq sənətinin inkişafına 171,6 mln. manat vəsait xərclənilib.

Büdcə xərclərinin əsas yerlərindən birini tutan nəqliyyat infrastrukturuna 1 582 mln. manat vəsait ayrılıb. Maliyyə naziri vurğulayıb ki, bu vəsait hesabına ölkə ərazisində respublika əhəmiyyətli avtomobil yollarının, yol qovşaqlarının, piyada keçidlərinin, regionlarda çaylar üzərində körpülərin, yeni və mövcud metro stansiyalarının tikintisi və yenidən qurulması, habelə, yeni gəmi-bərələrin və tankerlərin, dəmir yolu və metro vaqonlarının və ixtisaslaşmış avadanlıqların alışı həyata keçirilib, Lənkəran və Zaqatalada beynəlxalq statusa malik hava limanları istismara verilib.

S. Şərifov onu da əlavə edib ki, 2008-ci ilin sonuna Azərbaycanın daxili və xarici dövlət borcu 2 686 mln. manat səviyyəsində və ya ümumi daxili məhsulun 7,1%-nə bərabər olub.