Maliyyə

Ana səhifə

Maliyyə

«UniLeasing» şirkəti ötən il lizinq portfelini 55% genişləndirib

19 yanvar 2009 07:55 (UTC +04:00)

Bakı. Elnur Hüseynquluyev – APA-Economics. Azərbaycanın «UniLeasing» şirkətinin lizinq portfelinin həcmi 2009-cu ilin yanvar ayının 1-nə 46,2 mln. ABŞ dolları təşkil edib ki, bu da ötən ilin əvvəlinə olan analoji göstəriciyə nisbətən 54,5% çoxdur. Bu müddət ərzində şirkətin regionlar üzrə portfeli 2,5 dəfə artaraq 7,5 mln. dollara çatıb.
Şirkətdən «APA-Economics»ə verilən məlumata görə, hesabat ilində şirkət tərəfindən 377 müqavilə bağlanılıb ki, bunun da ümumi dəyəri 28,3 mln. dollar təşkil edib.
Hesabat dövrünün nəticələrinə əsasən, şirkətin lizinq müqavilələrinin sayı 2 dəfə ataraq 750-ə çatıb. İl ərzində iqtisadiyyata yatırılan investisiyaların həcmi isə 19,5% artaraq 27,6 mln. dollar təşkil edib. Bu müddət ərində şirkətin nizamnamə kapitalı sabit qalaraq 1,8 mln. manat olub.
Ötən il ərzində «UniLeasing» tərəfindən bazara bir neçə yeni məhsul təqdim olunub ki, bunların sırasında «Qiymətinin 10%-i məbləğində avtomobil», «10 il müddətinə qədər kommersiya tipli daşınmaz əmlakın lizinqi», «İstifadədə olmuş yük avtomobillərinin lizinqi» və «İslam lizinqi» var.
Ötən il ərzində ABŞ «Eximbank»ı tərəfindən şirkətə 2,5 mln. dollarlıq kredit xətti açılıb, Avropa Yenidənqurma və İnkişaf Bankı (EBRD) ilə «Avropa idarəetmə sisteminin tətbiqi» üzrə birgə layihə həyata keçirilib, Qiymətli Kağızlar üzrə Dövlət Komitəsində şirkətin qiymətli kağızlar emissiyasının prospekti qeydiyyata alınıb və Saatlı filialı açılıb.
Xatırladaq ki, təsisçisi «UniBank» Səhmdar Kommersiya Bankı olan «UniLeasing» şirkəti 2004-cü ildən fəaliyyət göstərir. Şirkətin Gəncə, Lənkəran, Şəki, Quba və Saatlıda nümayəndəlikləri var.