Maliyyə

Ana səhifə

Maliyyə

Ötən il Azərbaycanda iqtisadi inkişaf tempi 11%-ə çatıb

19 yanvar 2009 14:56 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanda 38 mlrd. manatlıq ümumi daxili məhsul (ÜDM) istehsal olunub ki, onun həcmi əvvəlki ilə nisbətən müqayisəli qiymətlərlə 10,8% və ya 3,7 mlrd. manat artıb.
Dövlət Statistika Komitəsindən «APA-Economics»ə verilən məlumata görə, 2008-ci ildə ÜDM-in adambaşına düşən həcmi 9,5% artaraq 4 439,9 manata (5 403,9 ABŞ dollarına) çatıb.
Hesabat ilində iqtisadiyyatın bütün sahələrində cari qiymətlərlə 55,1 mlrd. manatlıq məhsul istehsal olunub və xidmətlər göstərilib. İstehsalı təmin etmək üçün 17,1 mlrd. manatlıq və ya məhsul buraxılışının 31,1%-i qədər mal və xidmətlər sərf edilib.
ÜDM-in 70,8%-i iqtisadiyyatın istehsal, 22,1%-i xidmət sahələrinin payına düşüb, məhsula və idxala xalis vergilər isə ÜDM-in 7,1%-ni təşkil edib.
Bu dövrdə sənayedə 21,8 mlrd. manatlıq, yaxud ÜDM-in 57,4%-i qədər, kənd təsərrüfatı, ovçuluq və meşə təsərrüfatında 2,2 mlrd. manatlıq (müvafiq olaraq 5,8%), tikintidə 2,9 mlrd. manatlıq (7,6%), nəqliyyatda 1,9 mlrd. manatlıq (5,1%), poçt və rabitədə 708,7 mln. manatlıq (1,9%), topdan və pərakəndə ticarət, avtomobillərin, məişət məmulatlarının və şəxsi istifadə əşyalarının təmiri sahəsində 2 mlrd. manatlıq (5,3%), mehmanxana və restoran xidmətlərində 283,1 mln. manatlıq (0,7%), sosial və digər xidmətlər sahələrində isə 3,5 mlrd. manatlıq (9,1%) əlavə dəyər yaranıb.