Maliyyə

Ana səhifə

Maliyyə

Azərbaycan iqtisadiyyatının canlandırılmasına dövlət bir neçə milyard manat ayıracaq

20 yanvar 2009 10:51 (UTC +04:00)

APA-nın məlumatına görə, bunu Azərbaycan Milli Bankı (AMB) İdarə Heyətinin sədri Elman Rüstəmov bildirib: «Mərhələlərlə bazar şərtlərinə uyğunlaşdırma aparılacaq».
E.Rüstəmov hazırda başlıca olaraq iqtisadiyyatın pula olan tələbatının ödənilməsi məsələsi üzərində düşünüldüyünü vurğulayıb. AMB sədri bu gün ölkə iqtisadiyyatının real sektorunun pula tələbatının böyük olduğunu bildirib. Banklar tərəfindən böyük həcmdə kreditlərin xaricə qaytarılmasının iqtisadiyyatda likvidliyi azalda biləcəyini deyən E.Rüstəmov iqtisadiyyata, real sektora və məşğulluğa olan mənfi xarici təsirin azaldılması və neytrallaşdırılmasını vacib sayır. Bununla bağlı, mənfi amillərin neytrallaşdırılması siyasəti çərçivəsində dövlət maliyyələşmə proqramı üzrə mərhələlərlə müəyyən vəsaitlərin iqtisadiyyata verməyi nəzərdə tutur.
E.Rüstəmovun sözlərinə görə, ölkə iqtisadiyyatının pula olan tələbatının təmin edilməsi konkret rəqəmlər müəyyən olunmasa da, söhbət bir neçə milyard manatdan gedir: «Hazırda bir neçə yüz milyon iqtisadiyyatın pulla olan tələbatını təmin etmək iqtidarında deyil. İki il ərzində banklar xaricə 2,5 mlrd. dollar məbləğində xarici öhdəliklər qaytarıb ki, ən azı bu vəsaiti əvəz etmək lazımdır».
AMB sədri vurğulayıb ki, eyni zamanda Milli Bank tərəfindən pul-kredit siyasətinin yumşaldılması davam etdiriləcək: «Bir sıra dövlətdə uçot dərəcələri artıq sıfır səviyyəsinə yaxınlaşır. Bizdə inkişaf etmiş ölkələrlə müqayisədə faiz dərəcələrində fərq var və uçot dərəcəsi bu səviyyəyə çatmayacaq. Lakin həm yenidənmaliyyəşmədə, həm də ehtiyat normalarında yumşaltma siyasəti davam etdiriləcək».
E.Rüstəmov əlavə edib ki, hazırda başlıca məqsəd iqtisadi və işgüzarlıq fəallığının bərpası, məşğulluğun aşağı düşməməsi və s. kimi vacib məsələlərdən ibarətdir.