Maliyyə

Ana səhifə

Maliyyə

Azərbaycanda əsas kapitala yatırılan investisiyaların həcmi ötən il 34% artıb

21 yanvar 2009 07:03 (UTC +04:00)

Bakı. Nicat Mustafayev – APA-Economics. Ötən il Azərbaycanın iqtisadi və sosial sahələrinin inkişafı üçün bütün maliyyə mənbələrindən əsas kapitala 9 073,6 mln. manat məbləğində və ya əvvəlki ilin müvafiq dövrünün səviyyəsindən 34,3% çox investisiya yönəldilib.
Dövlət Statistika Komitəsindən «APA-Economics»ə verilən məlumata görə, dövlət mülkiyyətinə məxsus müəssisə və təşkilatlar əsas kapitala 5 677,4 mln. manat və ya ümumi investisiyanın 62,6%-i, qeyri-dövlət müəssisələri 3 396,2 mln. manat və ya 37,4%-i qədər sərmayə yatırıb.
Tikinti-quraşdırma işlərində istifadə edilmiş investisiyanın həcmi əvvəlki illə müqayisədə 56,7% artaraq 5 620,4 mln. manata çatıb. İstehsal təyinatlı obyektlərin inşasında 6 519,2 mln. manat, qeyri-istehsal təyinatlı obyektlərin tikintisində 2 554,4 mln. manatlıq investisiyadan istifadə edilib.
Qeyd edək ki, 2008-ci il ərzində əsas kapitala yönəldilmiş bütün investisiyanın 44,3%-i sənaye sahələrinin inkişafına, 3,7%-i kənd təsərrüfatına, 1%-i ticarət və xidmətə, 22,5%-i nəqliyyata, 1,8%-i rabitəyə, 7,3%-i mənzil tikintisinə, 2,8%-i səhiyyəyə, 3,1%-i təhsilə, 13,5%-i isə digər sahələrə sərf edilib.