Maliyyə

Ana səhifə

Maliyyə

Azərbaycanın səhm bazarının həcmi yanvar-fevral aylarında 22% azalıb

29 mart 2009 07:22 (UTC +04:00)

Bakı. Nicat Mustafayev – APA-Economics. Bu ilin yanvar-fevral aylarında Azərbaycanın səhm bazarının ümumi həcmi ötən ilin müvafiq dövrünə nisbətən 22% azalaraq 58,62 mln. manat təşkil edib. Bunun 19,8 mln. manatı ilkin bazarın, 38,82 mln. manatı isə təkrar bazarın payına düşür.
Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, təkrar səhm ticarətinin həcmi Bakı Fond Birjasında (BFB) 21,66 mln. manat təşkil edib ki, bu da birjadankənar bazarda səhm ticarətinin həcmi (17,16 mln. manat) ilə müqayisədə 26% çoxdur.
Mütəşəkkil səhm bazarının və investisiya alətlərinin real bazar dəyərinin formalaşdırılması istiqamətində həyata keçirilən tədbirlər nəticəsində ötən ilin müvafiq dövrünə nisbətən BFB-da təkrar səhm ticarətinin həcmi 722 dəfə, bağlanmış əqdlərin sayı isə 10 dəfə artıb, paralel olaraq birjadankənar bazarda bağlanmış əqdlərin sayı isə 81% azalıb.
Eyni zamanda, hesabat dövründə BFB-da 1,89 mln. səhm üzrə 593 alqı-satqı əqdi, birjadankənar bazarda isə 3,93 mln. səhm üzrə 123 alqı-satqı əqdi bağlanıb.
Hesabat aylarında borc qiymətli kağızları bazarının ümumi həcmi 1 537,2 mln. manat təşkil edib ki, ondan 234,2 mln. manat ilkin, 1,303 mln. manat isə təkrar bazarın payına düşür. İlkin bazarda 89,80 mln. manat dövlət istiqrazları (DQİ), 144,4 mln. manat isə Milli Bankın qısamüddətli notlarının payına düşüb.
Təkrar bazarda dövlət istiqrazları ilə aparılan ticarət əməliyyatlarının həcmi 85,21 mln. manat, Milli Bankın qısamüddətli notları ilə 58,33 mln. manat, korporativ istiqrazlarla isə 2,12 mln. manat təşkil edib. Milli Bankın qısamüddətli notları ilə həyata keçirilmiş REPO əməliyyatlarının həcmi 1,137 mln. manat, dövlət qısamüddətli istiqrazları ilə keçirilmiş REPO əməliyyatlarının həcmi isə 20,39 mln. manat təşkil edib.