Maliyyə

Ana səhifə

Maliyyə

Azərbaycan Dövlət Neft Şirkətinin mənfəəti rekord həddə çatıb

29 mart 2009 08:16 (UTC +04:00)

Bakı. Vüqar İsrafilov – APA-Economics. Azərbaycan Respublikası Dövlət Neft Şirkətinin (ARDNŞ) 2008-ci ildə əldə etdiyi mənfəət 2 544,2 mln. manat təşkil edib. Bu barədə «APA-Economics»ə hökumətdəki mənbələrdən məlumat verilib.

Ötən maliyyə ilinin yekunlarına görə, ölkənin ən iri milli şirkəti üzrə mənfəət göstəricisi ARDNŞ-in fəaliyyətə başladığı müddətdə ilk dəfədir ki, vergi ödənilənədək 3 mlrd. ABŞ dollar ekvivalentindən çoxdur. Bu zaman şirkət üzrə kapital qoyuluşlar da rekord həddə çatıb və 2007-ci ilə nisbətən 8,9% artaraq 836,5 mln. manata bərabər olub. ARDNŞ üzrə qazma əməliyyatlarına 234,8 mln. manat, tikinti işlərinə isə 450,5 mln. manat ayrılıb. Nəticədə, Dövlət Neft Şirkətinin aktivləri 2008-ci ildə 14,9% artıb.

Qeyd edək ki, ARDNŞ üzrə vergi ödənişləri hökumət tərəfindən 1 351,6 mln. manat səviyyəsində qiymətləndirilir və ölkə üzrə məcmu vergi tədiyyələrinin strukturunda 23,52% təşkil edir. Şirkətin Dövlət Sosial Müdafiə Fonduna ayırdığı vəsait öz növbəsində 108,2 mln. manata yaxın olub. Maraqlıdır ki, ARDNŞ-da əmək haqqı fonduna ayrılan vəsait 2008-ci ildə 30% artıb və ilin yekunlarına görə 361,4 mln. manata çatıb.

Xatırladaq ki, ötən il ARDNŞ tərəfindən 9 337,1 min ton neft və 8 236,65 mln. kubmetr qaz hasil olunub. Bu zaman şirkət üzrə neft ixracı 2 280,94 min. ton, mavi yanacağın xarici bazarlarda satışı isə 818,93 mln. kubmetr təşkil edib. Eyni zamanda, ARDNŞ üzrə qazma gedişi 202 954 metrə bərabər olub.