Maliyyə

Ana səhifə

Maliyyə

«Bank Standard» yeni uduş kampaniyası keçirir

29 mart 2009 12:20 (UTC +04:00)

Bakı. Elnur Hüseynquluyev – APA-Economics. Azərbaycanın «Bank Standard» Səhmdar Kommersiya Bankı (SKB) bu ilin aprel ayının 1-dən 30-dək «MasterCard» və «Maestro» plastik kart sahibləri üçün «Finala dəvət» adlı uduş kampaniyası keçirəcək.
Bankın baş ofisindən «APA-Economics»ə verilən məlumata görə, kampaniya çərçivəsində 4 uduş paketi oynanılacaq. Bu paketlərdən hər birinə UEFA Çempionlar Liqasının final matçına bilet, Roma şəhərinə təyyarə bileti (gediş və gəliş daxil olmaqla) və İtaliya paytaxtında mehmanxanada yer daxildir. Bu ilin may ayının 27-də keçiriləcək final matçına biletləri «UEFA Champions League 2009»un rəsmi sponsoru olan «MasterCard» təqdim edir.
Kampaniyanın iştirakçısı olmaq üçün «Bank Standard» tərəfindən emissiya edilən «MasterCard» və «Maestro» plastik kart sahibləri həmin kart vasitəsilə yuxarıda qeyd olunan müddət ərzində POS-terminal, bankomat və ya İnternet vasitəsilə tranzaksiyalar həyata keçirməlidir. Lotereya şansı verən hər tranzaksiyanın məbləği azı 50 manat (dollar və ya avro) olmalıdır. «Hər tranzaksiya bir lotereya şansı gətirdiyinə görə, müştəri nə qədər çox tranzakisya həyata keçirərsə, onun Avropanın ən möhtəşəm futbol şoularından birində iştirak etmək ehtimalı da artacaq», - deyə bankdan bildirilib.
Qeyd edək ki, lotereya tirajı 2009-cu il mayın 4-də «Bank Standard»ın Azərbaycan pr-ti,4 ünvanında yerləşən mərkəzi ofisində keçiriləcək.
Xatırladaq ki, «AB Standard» Şirkətlər Qrupuna daxil olan «Bank Standard» SKB 1995-ci ildən fəaliyyət göstərir. Cari ilin yanvar ayının 1-nə bankın aktivlərinin həcmi 619,085 mln. manat, kredit portfeli 394,421 mln. manat, depozit portfeli 191,812 mln. manat, məcmu kapital 77,356 mln. manat, o cümlədən nizamnamə kapitalı 64,6 mln. manat təşkil edib. Bankın respublika üzrə 36 filialı fəaliyyət göstərir.