Maliyyə

Ana səhifə

Maliyyə

Bakıda Küveyt-Azərbaycan İnvestisiya Şirkətinin təsis olunmasına dair saziş imzalanıb

30 mart 2009 09:38 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan İnvestisiya Şirkəti (AİŞ) ilə Küveyt Maliyyə Evinin törəmə qurumu olan «Turkapital» şirkəti arasında «Küveyt-Azərbaycan İnvestisiya Şirkəti» QSC-nin təsis edilməsinə dair səhmdarlar razılaşması imzalanıb. «APA-Economics»in məlumatına görə, sənədi AİŞ-in icraçı direktoru Əfqan İsayev və «Turkapital»ın İdarə Heyətinin sədri Fəvvaz əl-İssa imzalayıblar.
Tədbirdə çıxış edən Ə.İsayev qeyd edib ki, hazırda Azərbaycanda neft sektoru ilə yanaşı qeyri-neft sektorunun inkişafına da diqqət yetirilir və bunun nəticəsi olaraq ötən il ərzində qeyri-neft sektorunda 15,7%-lik artım müşahidə olunub, özəl bölmənin ÜDM-dəki payı isə 85%-ə çatıb: «Sənədə əsasən, yeni yaradılan şirkət qeyri-neft sektorunun müxtəlif sahələrinə xarici investisiyaların cəlb edilməsi, yerli müəssisələrə sərmayə qoyuluşları, maliyyə sahəsində məsləhət xidmətlərinin göstərilməsi, daşınmaz əmlak, infrastruktur və digər sahələrlə bağlı layihələrdə iştirakını həyata keçirəcək».
Ə.İsayev həmçinin bildirib ki, «Küveyt-Azərbaycan İnvestisiya Şirkəti» QSC-nin qeydiyyat prosedurasının cari ilin aprelin sonunadək başa çatacağı gözlənilir.
Tədbirdə çıxış edən F.əl-İssa öz növbəsində Azərbaycan iqtisadiyyatının əhəmiyyətindən danışıb və bildirib ki, yeni şirkətin səhmdarları artıq ölkə iqtisadiyyatında bir sıra sahələrdə təhlillər aparıb və bir neçə sahəni prioritet sayaraq layihələr həyata keçirməyi nəzərdə tutur: «Biz həmçinin yeni şirkətə xarici və yerli investorları cəlb etmək və Azərbaycandan kənarda layihələrdə iştirak etmək niyyətindəyik. Bütün bu məsələlər səhmdarların bu gün keçiriləcək ilk iclasında müzakirə olunacaq».
Qeyd edək ki, Küveyt-Azərbaycan İnvestisiya Şirkətinin nizamnamə kapitalı ilkin mərhələdə 500 min ABŞ dolları, o cümlədən «Turkapital»ın payı 75%, AİŞ-in 25% təşkil edəcək. Şirkətin nizamnamə kapitalının yaxın 2 il ərzində tədricən 20 mln. dollaradək artırılması nəzərdə tutulur. Nizamnamə kapitalının artırılması qeyd olunan faiz nisbətlərinə uyğun olaraq aparılacaq.