Maliyyə

Ana səhifə

Maliyyə

Azərbaycan Milli Bankının xalis xarici aktivləri ilin əvvəlindən 7% azalıb

30 mart 2009 12:23 (UTC +04:00)

Bakı. Vahab Rzayev – APA-Economics. Azərbaycan Milli Bankının (AMB) xalis xarici aktivlərinin həcmi 2009-cu ilin mart ayının 1-nə 4 754,1 mln. manat təşkil edib. AMB-dən «APA-Economics»ə verilən məlumata əsasən, bu göstərici ötən ilin müvafiq dövrü ilə müqayisədə 1 108,1 mln. manat və ya 30,4% artıb. Eyni zamanda, AMB-nin xalis xarici aktivləri fevral ayı ərzində 319,8 mln. manat və ya 6,3%, ilin əvvəlindən isə 361,2 mln. manat və ya 7,1% azalıb.
Beləliklə, son iki ay ərzində AMB-nin xalis xarici aktivlərinin azalması müşahidə olunub. Hətta fevral ayı ərzində baş verən azalmanın həcmi ötən il ərzində orta aylıq artımı 2,4 dəfə üstələyib. Qeyd edək ki, Milli Bankın xalis xarici aktivlərinin ən iri artımı dekabr ayına təsadüf edib. Belə ki, dekabrda bu göstərici 456,5 mln. manat artıb ki, bu da illik artımın 41,2%-i deməkdir. Göründüyü kimi, kəskin artımdan sonrakı iki ay ərzində nəzərə çarpan dərəcədə azalma baş verib ki, bunu da əsasən bir amil ilə əlaqələndirmək olar. Belə ki, bu cür azalma Milli Bank tərəfindən manatın sabit saxlanılması məqsədi ilə öz xarici ehtiyatların tədricən daxili valyuta bazarında satılması nəticəsində baş verə bilərdi. Bu barədə dəqiq məlumat olmasa da, mərkəzi bankın xarici aktivlərinin azalması adətən həmin səbəbdən baş verir. Bu da öz növbəsində dünya maliyyə böhranı ilə əlaqədar olan amillərin manata təzyiqləri ilə bağlıdır.
Xatırlatmaq lazımdır ki, Milli Bankın rəhbərliyi tərəfindən manatın devalvasiyasına imkan verilməyəcəyi barədə bəyanatlar verilib. Hələlik bu, reallıqda öz əksini tapmaqdadır, lakin həmin prosesin valyuta ehtiyatlarının və paralel olaraq AMB-nin xarici aktivlərinin azalmasına, şübhəsiz ki, öz təsirini göstərməkdədir.