Maliyyə

Ana səhifə

Maliyyə

Yanvar-fevral aylarında Azərbaycanın uzaq xarici dövlətlərlə ticarət dövriyyəsində müsbət, MDB ilə mənfi saldo yaranıb

31 mart 2009 07:19 (UTC +04:00)

Bakı. Rəşad Süleymanov – APA-Economics. Cari ilin yanvar-fevral aylarında Azərbaycanın uzaq xarici dövlətlərlə idxal-ixrac əməliyyatlarında 647 347,4 min ABŞ dolları həcmində müsbət saldo, MDB ölkələri ilə ticarət dövriyyəsində isə 81 482,5 min ABŞ dolları dəyərində mənfi saldo yaranıb. Bu barədə «APA-Economics»ə Dövlət Gömrük Komitəsindən məlumat verilib.
Hesabat dövründə Azərbaycandan uzaq xarici ölkələrə 1 314 328 min dollar, MDB ölkələrinə isə 177 587 min dollar dəyərində əmtəə çıxarılıb. Ölkəyə bu ölkələrdən idxal isə müvafiq olaraq 666 980,6 min və 259 069,5 min dollar təşkil edib.
Azərbaycandan uzaq xarici ölkələrə əsasən mineral yanacaq, neft və onların emal məhsulları, bitumlu minerallar, alüminium və alüminium məmulatları, ət, balıq məhsulları, MDB ölkələrinə mineral yanacaq, neft və onların emal məhsulları, bitumlu minerallar, heyvan və ya bitki mənşəli piylər və yağlar, meyvə və s. ixrac olunub.
Hesabat dövründə xarici ölkələrdən əsasən avadanlıqlar və mexaniki qurğular, elektrik maşınları və avadanlıqları, onların hissələri, quru nəqliyyat vasitələri, qara metallardan məmulatlar, MDB ölkələrindən isə dənli bitkilər, elektrik maşınları və avadanlıqları, onların hissələri, quru nəqliyyat vasitələri, avadanlıqlar və mexaniki qurğular, tütün və tütünün sənaye əvəzediciləri gətirilib.
Qeyd edək ki, hesabat dövründə xarici ticarətlə 3 961 hüquqi və fiziki şəxs məşğul olub. İxrac əməliyyatlarında dövlət sektorunun payı 94,25%, özəl sektorun 5,10%, fiziki şəxslərin payı 0,65% olub. İdxalda isə bu göstəricilər müvafiq olaraq 27%, 68,07% və 4,93% təşkil edib.