Maliyyə

Ana səhifə

Maliyyə

Azərbaycana xaricdən cəlb edilən kapitalın həcmi 10% artıb

01 aprel 2009 10:30 (UTC +04:00)

Bakı. Vahab Rzayev – APA-Economics. Azərbaycanın 2008-ci il üzrə tədiyyə balansında xaricdən cəlb olunan kapitalın ümumi məbləği 7 569,6 mln. ABŞ dolları təşkil edib ki, bu da ötən ilin əvvəlinə olan analoji göstəricidən 9,7% çoxdur.
Azərbaycan Milli Bankından «APA-Economics»ə verilən məlumata əsasən, bu göstəricinin artması əsasən dövlət təminatı olmayan xarici kreditlərin və qeyri-neft sektoruna birbaşa investisiyaların cəlb olunması ilə bağlıdır.

(mln. dollar)

Cəlb olunan xarici kapitalın strukturu
	2007-ci il	2008-ci il
Birbaşa investisiyalar	4 526,0	3 982,6
- neft-qaz sektoru	4 086,1	3 339,8
- digər sektorlar	439,9	642,8
Kreditlər və digər investisiyalar	2 305,9	3 583,5
- dövlət təminatlı kreditlər	441,3	698,7
- dövlət təminatlı olmayan kreditlər	1 435,3	2 344,6
- neft-qaz sektoru	460,4	690,1
- banklar	842,7	1 278,5
- digərləri	132,2	376,0
- digər investisiyalar	429,3	540,2
Neft bonusu	68,2	3,5
CƏMİ	6 900,1	7 569,6

Milli Bankın tədiyyə balansının şərhinə əsasən, birbaşa investisiyalar formasında xaricdən cəlb edilən sərmayələrin ümumi məbləği 4 mlrd. dollara yaxın olub. Nəticədə, investisiyaların strukturunda neft-qaz sektorunun xüsusi çəkisi 83,9% təşkil edib. Həmin sərmayələr iri neft-qaz layihələrinin maliyyələşdirilməsi ilə əlaqədar ölkə iqtisadiyyatında istifadə olunub. Qeyri-neft sektoruna isə cəlb olunmuş birbaşa investisiyaların ümumi məbləği 2007-ci ilə nisbətən 1,5 dəfə artaraq 642,8 mln. dollara çatıb ki, bu da ölkəyə cəlb olunmuş birbaşa xarici investisiyaların ümumi həcminin 16,1%-nə bərabərdir.
AMB-nin hesablamalarına görə, birbaşa investisiyalar üzrə xaricə yönəldilmiş və repatriasiya olunmuş sərmayələrin ümumi məbləği 53% azalaraq 4 mlrd. dollara düşüb. Bu azalmanın səbəbi «Əsrin müqaviləsi» çərçivəsində ABƏŞ-in fəaliyyəti ilə bağlı əvvəlki dövrlərdə ölkə iqtisadiyyatında istifadə olunmuş birbaşa investisiyalar üzrə kapitalın repatriasiyasının azalması ilə bağlıdır. Belə ki, 2007-ci ildə neft-qaz sektoru üzrə repatriasiya olunmuş investisiyaların həcmi 9,1 mlrd. dollar məbləğində olduğu halda, 2008-ci ildə bu göstərici 2,3 dəfə azalaraq cəmi 3,9 mlrd. dollar təşkil edib.