Maliyyə

Ana səhifə

Maliyyə

«AzSığorta» şirkəti iki illik fəaliyyətinin yekunlarına dair mətbuat konfransı keçirib

02 aprel 2009 12:19 (UTC +04:00)

Bakı. Elnur Hüseynquluyev – APA-Economics. Bu gün Bakıda «AzSığorta» ASC-nin iki illik fəaliyyətinin nəticələrinə həsr olunmuş mətbuat konfransı keçirilib. «APA-Economics»in məlumatına görə, tədbirdə çıxış edən şirkətin İdarə Heyətinin sədr müavini Xəyal Məmmədxanlı şirkətin 2006-cı ilin dekabr ayından indiyədək əldə etdiyi nailiyyətlər, illik və dövrü hesabatlar, həmçinin ölkənin sığorta bazarına təqdim etdiyi yeni məhsullar barədə ətraflı məlumata verib.
X.Məmmədxanlının sözlərinə görə, 2008-ci il ərzində «AzSığorta» şirkətinin daxilolmalarının həcmi 10 mln. manatdan artıq olub ki, bu da 2007-ci ilin yekun göstəriciləri ilə müqayisədə 2 dəfə çoxdur. Bu müddət ərzində şirkətin sığorta ödənişlərinin həcmi 8,7 dəfə artaraq 2,328 mln. manat təşkil edib.
X.Məmmədxanlı bildirib ki, ötən il ərzində yalnız «Avtomobillərin sığortası» növü üzrə 387 sığorta hadisəsi qeydə alınıb ki, bunun da 382-si şirkət tərəfindən ödənilib. Yalnız 5 ödənişdən imtina edilib ki, bu imtinaya əsas səbəb iki sığortalının sükan arxasında spirtli içki qəbul edərək avtomobili idarə etməsi, ikisinin sürücülük vəsiqəsinin olmaması, birinin isə saxta sənədlər düzəldərək kreditə avtomobil götürməsi olub.
Şirkətin növbəti illər üçün planlarını açıqlayan X.Məmmədxanlı bu il ərzində əlavə 15-20 min müştəri ilə sığorta müqaviləsinin imzalanacağını bildirib: «Ötən il ərzində şirkətin bağladığı sığorta müqavilələrinin sayı 150 minə yaxın olub. Bu isə təxminən 500 minə yaxın müştəri deməkdir. Qeyd etmək istəyirəm ki, bunların sırasında fiziki şəxslərlə yanaşı hüquqi şəxslər də var».
Bu il ərzində şirkətin Qəbələ rayonunda «Təbiət» filialının açılacağını bildirən sədr müavini yeni filialın yay aylarında istifadəyə veriləcəyini vurğulayıb: «Şirkətimiz bu il ərzində yalnız Qəbələ filialını açmaqla kifayətlənməyəcək. Eyni zamanda, regionda yeni sığorta məhsullarının tətbiqi ilə yanaşı şirkət əhali ilə daha sıx işləmək niyyətindədir».
Xatırladaq ki, «AzSığorta» şirkəti 2006-cı ilin dekabr ayında fəaliyyətə başlayıb. Ötən il ərzində şirkətin topladığı sığorta haqlarının həcmi 10,066 mln. manat, ödənişləri isə 2,328 mln. manat olub. Şirkətin respublika üzrə məcmu sığorta daxilolmalarında xüsusi payı 5,35%, ödənişlərdə isə 4,66% təşkil edib. Ölkə üzrə 7 filialı və 40-dan çox nümayəndəliyi olan şirkət müştərilərə 25 könüllü və 3 icbari sığorta növü üzrə xidmət göstər.