Maliyyə

Ana səhifə

Maliyyə

«UniBank» yeni depozit kampaniyasına başlayıb

02 aprel 2009 13:34 (UTC +04:00)

Bakı. Elnur Hüseynquluyev – APA-Economics. Azərbaycanın «UniBank» Səhmdar kommersiya Bankı (SKB) «Milyonçu ol» adlı yeni depozit aksiyasına başlayıb. Bankın baş ofisindən «APA-Economics»ə verilən məlumata görə, 2009-cu ilin mart ayının 30-dan iyul ayının 31-dək «Milyonçu ol» depozitinə vəsait qoyan bütün depozit sahibləri 1 mln. manatadək udmaq imkanı əldə edirlər.
Lotereyada iştirak etmək üçün «Unibank»da «Milyonçu» əmanətinə 1000 manatdan (dollar, avro) az olmayaraq yatırım həyata keçirmək və bu əmanəti uduşun keçirilməsi vaxtına (2010-cu ilin mart ayının 18-dək) qədər hesabda saxlamaq lazımdır. Bu depozitdə olan hər 1000 manat (dollar, avro) qələbə üçün 1 şansdır.
Qeyd edək ki, mükafatın ölçüsü aksiyanın keçirilməsi zamanı cəlb edilmiş depozitlərin həcmindən asılı olacaq. Yəni, müştərilər nə qədər çox əmanət yatırımı həyata keçirsələr, bir o qədər böyük məbləğdə mükafat oynanılacaq. Bu zaman mükafatın zəmanət verilmiş məbləği ən azı 150 min manat, maksimal dəyəri isə 1 mln. manat təşkil edəcək.
Lotereyada iştirakdan əlavə bütün «Milyonçu» əmanətçiləri öz vəsaitlərini illik 13%-lə yerləşdirə bilərlər.
Xatırladaq ki, təsisçisi Avropa Yenidənqurma və İnkişaf Bankı (15,15%), Almaniyanın DEG İnvestisiya Korporasiyası (8,33%), hüquqi (0,9%) və fiziki şəxslər (75,62%) olan «UniBank» SKB 1992-ci ildən fəaliyyət göstərir. Cari ilin yanvar ayının 1-nə bankın aktivlərinin həcmi 417,563 mln. manat, kredit portfeli 319,247 mln. manat, depozit portfeli 123,671 mln. manat, məcmu kapitalı 64,064 mln. manat, o cümlədən nizamnamə kapitalı 15 mln. manat olub. Bankın respublika üzrə 22 filialı, 22 mübadilə məntəqəsi, 57 bankomatı və 231 POS-terminalı mövcuddur.