Maliyyə

Ana səhifə

Maliyyə

Dünya maliyyə böhranı ilə əlaqədar Azərbaycanda «Opel» avtomobillərinin satış qiyməti azaldılır

03 aprel 2009 14:23 (UTC +04:00)

Bakı. Nicat Mustafayev – APA-Economics. Hazırda dünyada müşahidə olunan maliyyə böhranı ilə əlaqədar Almaniyanın «Opel» avtomobillərinin Azərbaycanda rəsmi distribütoru olan «Cahan Motors» şirkəti bütün modellərin satış qiymətini aşağı salıb. Bu barədə «APA-Economics»ə şirkətin satış şöbəsinin direktoru Qasım Bağırzadə məlumat verib.
Q.Bağırzadənin sözlərinə görə, şirkət hər ay hansısa bir modelin satış qiymətini 10-15% arasında endirir: «Ümumiyyətlə, maliyyə böhranına görə avtomobillərin satış qiymətləri 3-5% aşağı salınıb. Biz həmçinin alıcılara «Opel» avtomobillərini sərfəli kredit şərtləri ilə də təqdim edirik. Belə ki, avtomobilin satış qiymətinin 30%-ni öncədən ödəyən alıcı vəsaitin digər hissəsini 18%-lə 3 il ərzində ödəyə bilər».
Qeyd edək ki, «Cahan Motors» alıcılara «Opel» avtomobillərinin «Insignia», «Tigra», «Zafira», «Astra TT», «Corsa», «Vectra» və digər modellərini təklif edir.
Xatırladaq ki, «Cahan Holding» Şirkətlər Qrupuna daxil olan «Cahan Motors» şirkəti 2001-ci ildən fəaliyyət göstərir və 2007-ci ildən etibarən «Opel» avtomobillərinin Azərbaycanda rəsmi distribütorudur.
Ümumilikdə, 1995-ci ildən Azərbaycanda fəaliyyət göstərən «Cahan Holding» Şirkətlər Qrupuna 9 şirkət daxildir və burada 3 mindən artıq işçi çalışır.