Maliyyə

Ana səhifə

Maliyyə

Azərbaycanda milli valyutada vəsaitlərin yerləşdirmə və cəlbetmə dərəcələri arasında fərq 5,94 faiz bəndi təşkil edib

03 aprel 2009 15:07 (UTC +04:00)

Bakı. Vüqar İsrafilov – APA-Economics. Son bir həftə ərzində Azərbaycan banklararası bazarında milli valyutadakı kredit vəsaitləri üzrə orta faiz dərəcələri yenidən artmağa başlayıb.

«APA-Economics»in Bakı Banklararası Valyuta Birjasının (BBVB) məlumatlarına istinadən verdiyi xəbərə görə, martın 19-dan aprel ayının 3-dək banklararası manat kreditləri üzrə vəsaitlərin yerləşdirmə dərəcələri orta hesabla 0,89 faiz bəndi artıb. Əvvəlki həftə ərzində isə müvafiq dərəcələr 1,392 faiz bəndi azalsa da, bu həftə faiz dərəcələri 7, 30, 90 və 180 günlük manat kredit alətləri üzrə yüksəlib. Nəticədə, pul bazarının əsas indikatorlarından biri sayılan 90 günlük BakİBOR əmsalı illik 15,25%-dən 15,88%-dək artıb. Maraqlıdır ki, vəsaitlərin təklif olunması üzrə dərəcələrin artmasına baxmayaraq, əvvəlki həftə ilə müqayisədə bankların mütəşəkkil pul bazarında manat vəsaitlərinin cəlbetmə dərəcələri əksinə, enişi davam etdirib. Orta hesabla 0,63 faiz bəndi qədər azalma müşahidə olunub, 90 günlük kreditlər üzrə BakİBİD pul indikatoru isə illik 9,94% çatıb. Nəticədə, pul bazarında ən çox işlənilən kredit faiz dərəcəsi (often used) 90 günlük kreditlər üzrə illik 12,42%-dan 12,91%-ə qalxıb. Ümumi hesabda isə manat vəsaitlərinin yerləşdirmə və cəlbetmə dərəcələri arasında fərq 5,94 faiz bəndi təşkil edib.

Qeyd edək ki, bankların faiz dərəcələri birjanın hesabladığı BakİBOR (Baku İnterbank Offer Rate) və BakİBİD (Baku İnterbank Bid Rate) göstəricilərində əksini tapıb.
Xatırladaq ki, Azərbaycan Milli Bankının təkrar maliyyələşdirmə dərəcəsi ayın əvvəlindən 3%-ə çatdırılıb. Qlobal iqtisadi böhranın dərinləşməsi ilə əlaqədar son bir neçə ay ərzində ölkədə makroiqtisadi və maliyyə sabitliyinin qorunması məqsədi ilə Azərbaycan Milli Bankının təkrar maliyyələşdirmə dərəcəsi beş dəfə azaldıb. BakİBOR və BakİBİD - pul bazarında kreditlərin cəlb olunması və yerləşdirilməsi göstəriciləridir. Bu indikatorların hesablanması pul bazarının aparıcı bank-operatorları (market-meykerlər) tərəfindən elan edilən kreditlərin cəlb olunması və yerləşdirilməsi dərəcələri əsasında aparılır.