Maliyyə

Ana səhifə

Maliyyə

Azərbaycan Dövlət Neft Fondunun aktivlərinin bu il sabit qalacağı gözlənilir

06 aprel 2009 07:46 (UTC +04:00)

Bakı. Nicat Mustafayev – APA-Economics. Azərbaycan Respublikası Dövlət Neft Fondu (ARDNF) qlobal maliyyə böhranından sonra daha uzunmüddətli sərmayədar olmaqla, daha riskli və gəlirli sahələrə vəsait yatırmaq niyyətindədir. «APA-Economics»in məlumatına görə, bunu ARDNF-in icraçı direktoru Şahmar Mövsümov bildirib.
Ş.Mövsümovun sözlərinə görə, hazırda bu cür addımın atılması tezdir və gələcəkdə bunu həyata keçirmək üçün dünya iqtisadiyyatındakı vəziyyət sabitləşməlidir.
Bundan başqa, Ş.Mövsümov bildirib ki, hazırda ARDNF-in sərəncamında 11 mlrd. ABŞ dolları həcmində vəsait mövcuddur və bunlar beynəlxalq maliyyə bazarlarında yerləşdirilir: «Neftin qiyməti 50 dollar/barel olarsa, 2009-cu ilin sonuna Fondun vəsaitlərinin elə 11 mlrd. dollar ətrafında qorunub saxlanması gözlənilir. Bu il Fonda nə qədər vəsait daxil olacaqsa, elə həmin həcmdə vəsait xərclənəcək».
Ş.Mövsümovun sözlərinə görə, cari ilin sonuna ARDNF-in vəsaitlərinin azalmayacağı gözlənilir. Neft vəsaitlərinin sərmayə kimi yatırılmasına gəldikdə isə ARDNF-in icraçı direktoru qeyd edib ki, Fond bu istiqamətdə konservativ siyasət həyata keçirir: «Maliyyə böhrana baxmayaraq, ARDNF ötən ili gəlirlə başa vurub». Müqayisə üçün Ş.Mövsümov ötən il ərzində 23%-dən artıq vəsait itirən Norveç Neft Fondunu misal gətirib.