Maliyyə

Ana səhifə

Maliyyə

Azərbaycanın iki iri sığorta şirkətinin ASC-yə çevrilməsi ilə bağlı əlavə vaxt veriləcək

07 aprel 2009 08:59 (UTC +04:00)

Bakı. Elnur Hüseynquluyev – APA-Economics. Azərbaycan Maliyyə Nazirliyi Beynəlxalq Sığorta Şirkəti və «Azərsığorta» Dövlət Sığorta Kommersiya Şirkətinin ASC-yə çevrilməsi üçün hər iki təşkilata əlavə müddət verəcək. Bu barədə «APA-Economics»ə Maliyyə Nazirliyi Dövlət Sığorta Nəzarəti Xidmətinin sektor müdiri Mahir Abdullayev məlumat verib.
M.Abdullayevin sözlərinə görə, ötən ilin mart ayının 15-də qəbul olunmuş «Sığorta fəaliyyəti haqqında» qanuna əsasən, Azərbaycanda fəaliyyət göstərən bütün sığorta təşkilatları ASC-yə çevrilməlidir: «Hazırda demək olar ki, bu prosesi Beynəlxalq Sığorta Şirkəti və «Azərsığorta» istisna olmaqla, bütün sığorta təşkilatları başa çatdırıb. Adları çəkilən bu iki şirkətin statusunun dəyişməməsinin səbəbi isə şirkətlərin səhmdar kapitalında dövlət payının olması, eyni zamanda bunun üçün müəyyən proseduralardan keçməsi zərurəti ilə bağlıdır. Bu şirkətlər də ASC-yə çevriləcək, lakin bunun üçün müəyyən vaxt tələb olunur».
M.Abdullayevin hər iki şirkətin ASC-yə çevrilməsi üçün Maliyyə Nazirliyi tərindən əlavə müddətin veriləcəyini bildirib.
Xatırladaq ki, Maliyyə Nazirliyi tərəfindən sığorta şirkətlərinin statusunun dəyişməsi ilə bağlı 2009-cu ilin mart ayının 31-dək müddət verilib. Həmin müddət bitdikdən sonra ASC formasında fəaliyyət göstərməyən sığorta şirkətlərinin lisenziyaları məhdudlaşdırılacaq və onlara əlavə 6 ay vaxt veriləcək. Bu müddət ərzində də şirkət öz öhdəliyini yerinə yetirməzsə, lisenziya tamamilə ləğv ediləcək.
Qeyd edək ki, hazırda Azərbaycanda 28 sığorta şirkəti fəaliyyət göstərir.